Ulttyq qoǵamdyq senim keńesiniń 4-otyrysynda keńes múshesi Aigúl Orynbek Túrkistan oblysyndaǵy birqatar olqylyqty jariia etti, dep habarlaidy QazAqparat.
«Qurmetti Qasym-Jomart Kemeluly! Siz óz Joldaýyńyzda «Biz tyńdaýshy memleket bolý kerek» ekenimizdi naqty aittyńyz. Sondyqtan der kezinde «sózden – iske» kóship, halyqtyń turmys-tirshiligimen tanys qoǵam belsendilerinen turatyn Ulttyq keńesti qurdyńyz. Búginde keńes ókilderi arqyly óńirlerdegi ózekti máselelerden habardar bolyp kelesiz. Bul – keńes jumysynyń tiimdiligi ǵana emes, memleketimizdegi ýaqyt kúttirmeitin túitkildi máselelerdiń oń sheshimin tabýy úshin mańyzy mol. Rasynda, Sizdiń tájiribeńizden jergilikti ákimder úlgi alý kerek dep oilaimyn. Ókinishke qarai, bizdiń ońtústikte halyqtyń únin tyńdaityn, jergilikti jurttyń problemalaryn jaqsy biletin qoǵam belsendileriniń pikiri eskerilmeidi. Senseńiz, atqarýshy organ sol aitylǵan problemalardy joiýdyń ornyna, kerisinshe bul máseleni kótergen, halyqqa janashyrlyq tanytqandarǵa qysym kórsetýde. Iá, sol máseleni kótergen ózińmen alysyp, aktýaldy másele jaiynda qalady», - dedi ol.
Onyń aitýynsha, ońtústik óńirinde sheshimin tappai jatqan áleýmettik problemalar jetip artylady.
«Al men bilgen máseleni, atqarýshy bilik ókilderiniń bilmeýi múmkin emes. Maǵan aitqan máseleniń, olarǵa aitylmaýy da múmkin emes. Endigi jerde kózboiaýshylyqty doǵarý kerek dep oilaimyn. Nemese qyzmettik qurylymdardy, ondaǵy basshylyq quramdy qaita jasaqtaý qajet. Taǵy bir shyndyq. «Barmaq basty – kóz qysty» áreketter barlyq óńirlerde keńinen etek jaiǵan. Máselen, jergilikti ákimdikterdiń janynan qurylǵan qoǵamdyq ári tártiptik keńesterdiń, komissiialardyń, uiymdardyń qyzmeti kóńilimnen shyqpaidy. Ne istep, jatqandary da beimálim. Jattandy jinalysty ǵana kóremiz. Aqiqatty aitýdyń ornyna jaǵympazdanyp, sol sheneýnikterdiń shashbaýyn kóterip jatyr-aý degen oiǵa qalasyń», - dedi Aigúl Orynbek.
Bul máseleni sheshý úshin ol Ulttyq qoǵamdyq senim keńesiniń múshelerin sol jergilikti komissiia quramyna qosýdy usyndy.
«Sonda Siz ben biz atqarýshy bilik organdarynda oryn alǵan olqylyqtardan habardar bolar edik. Sondai-aq, bul bastama arqyly sybailas jemqorlyq tetikteri men salalardaǵy salǵyrttyqtyń joly kesiler edi», - dedi ol.
Qoǵam belsendisi Prezident qoldaýynyń arqasynda orta kásiptik bilim beretin uiymdarda oqityn az qamtylǵan, kóp balaly otbasylardan shyqqan jasóspirimderge memleket tarapynan qoldaý úzilmei kele jatqandyǵyn aitady.
«Alaida, Túrkistan oblysynda bul salanyń ózi qyp-qyzyl bizneske ainalyp ketti. Biyl oblysymyzdyń aldyńǵy qatardaǵy, bazasy myqty birqatar oqý oryndary senimgerlik basqarýǵa jekemenshikke berildi. Qazirgi kezde ondaǵy ustazdar qýdalaýǵa ushyrap, mártebesi aiaqqa taptalyp jatyr. Ulaǵatty joldy tańdaǵandardyń ar-namysy men abyroiy osylaisha taptalyp jatqanda, bilim berý júiesi ońalady dep kim aitty? Buǵan kóz jumýǵa bolmaidy. Qazaqstannyń bolashaǵy baiandy bolýy osy bilimdi urpaqtyń qolynda ekenin eskersek, dál qazirgi sheshýshi sátte bilim júiesiniń tamyryna balta shabylyp jatyr dep men ashyq aita alamyn. Bul máseleler - ustazdardyń janaiqaiy men ondaǵy bilim oshaqtarynyń taǵdyry nazardan tys qalmaidy dep senemin», - dedi Aigúl Orynbek.
Onyń atap ótýinshe, jergilikti basqarý júiesi laiyqty jumys istese, halyqtyń bilikke degen senimi arta túsedi.
«Bizdiń óńir aýyzsý, kógildir otyny joq eldi mekender boiynsha kósh bastap tur. Máselen, isher sýynyń 1 litrin 2 teńgege satyp alyp otyrǵan aýdandar da bar. Ákimderdiń esebin tyńdasańyz, «Bári jaqsy, bári keremet! Ómir ǵajap!». Al bul kózboiaýshylyqtyń zardabyn tartatyn ádettegidei halyq. Biraq, turǵyndardy tirshilik nárinen taryqtyrý – halyqqa jasalǵan qiianat dep bilemin. Túrkistan oblysyndaǵy kommýnaldyq máseleler munymen bitpeidi. Oblystaǵy birqatar aýdandarda jyldar buryn tabiǵi gaz tartý úshin halyqtyń qaltasyn qaǵyp, teńge jinalǵan. Biraq, ol aýyldarǵa kógildir otyn áli kúnge deiin jetpei keledi. Jergilikti jurtty jaýyr etken, mezi etken másele osy», - dedi qoǵam belsendisi.
