Politsiianyń habarlaýynsha, 28 qarasha tús aýa er adam kópqabatty úidiń birinshi qabatyndaǵy notariýs keńsesinde áielin kepilge alyp, granata jaratynyn aityp qorqytqan. Jáńgir han kóshesindegi 73 úiden júzden astam adam evakýatsiialandy, dep jazady Azattyq.
Politseiler, prokýratýra men arnaiy qyzmet ókilderi er adammen kelissóz júrgizgen.
- Saǵat 13.10-da bir adam «102» nómerine qońyraý shalyp, «Jazira» aialdamasynda pyshaq pen granata ustaǵan er adamnyń qoqań-loqy jasap turǵanyn aitty. Politsiia aialdamaǵa kelgende er adam notariýsqa kirip, ishinen qulyptap alǵan eken. 13.25-te turǵyndardy evakýatsiialai bastadyq. Turǵyndardy №20 mekteptiń ǵimaratyna ornalastyryp, ystyq tamaq berdik. Saǵat 15.00-ge taman er adam alǵashqy talabyn aitty. Oqiǵa ornyna aǵasy men ápkesi keldi. Kelissózden keiin ol kepilge alǵan adamdy jiberdi, - dedi BQO politsiia departamenti bastyǵynyń mindetin atqarýshy Serik Súiinbaev.
Politsiianyń aitýynsha, er adam iri kólemde aqsha jáne ushaq talap etken. Kýágerlerdiń biri politseiler kelissóz kezinde terezeden er adamǵa konfet pen shampan bergenin aitty. Politsiia bul sózdi rastamady, joqqa da shyǵarǵan joq. Politsiianyń sózinshe, er adamnyń qolynda granatanyń mýliajy bolǵan.
Súiinbaev er adamnyń ústinen «Adamdy kepilge alý» baby boiynsha qylmystyq is qozǵalǵanyn aitty. Politsiianyń dereginshe, er adam buryn sottalǵan, eki ret qorǵaý nusqamasyn (bul qujat turmystyq zorlyq-zombylyq jasaǵan adamdarǵa eskertý retinde beriledi) alǵan.
Kepilde bolǵan áiel aýrýhanaǵa jetkizilgen. Onyń aiaǵynda pyshaq jaraqaty bolǵan. Politsiia oqiǵany «otbasylyq urys-keris» dep atady.
