Eńbek jáne halyqty áleýmettik qorǵaý ministrliginiń jumyspen qamtý departamentiniń direktory Erbolat Abýlhatin áielder kásipkerligin qoldaý maqsatynda memleket qandai sharalardy qolǵa alyp jatqanyn aityp berdi, dep habarlaidy "Ult aqparat".
«Memleket áielderdi jumyspen qamtyp, olardyń biznespen ainalysýyna qoldaý kórsetý maqsatynda birqatar is-sharany júzege asyryp jatyr. Sol sharalardyń biri – «Eńbek» baǵdarlamasynyń júzege asyrylýy. Byltyr «Eńbek» baǵdarlamasyna qatysqan 660 myńnan astam adamnyń 43 paiyzy, iaǵni 260 myńnan astamy áielder ekenin atap ótý kerek. Jalpy «Eńbek» baǵdarlamasy ásirese aýyl halqyn qoldaýǵa baǵyttalǵanyn bilesizder. Baǵdarlamanyń nátijeli tetikteriniń biri – azamattardyń kásipkerlik daǵdysyn shyńdaý. Osy baǵyt arqyly azamattarǵa kásipkerlik negizi oqytylady. Ótken jyly 73 myń adam osy kýrstan ótken. Sol sekildi jeńildetilgen mikronesie 18 myń adamǵa berildi», - dedi Erbolat Abýlhatin OKQ-da ótken baspasóz máslihatynda.
Departament direktory biyl Prezident tapsyrmasy boiynsha az qamtylǵan jáne kópbalaly otbasylarǵa mikronesie berý tártibi qaita qaralǵanyn aityp ótti.
«Biyl atalǵan sanattaǵy áielderge 7 jylǵa deiin jyldyq 4 paiyzben 20 mln teńgege deiin mikronesie beriledi. Osy shaǵyn nesie arqyly úide otyryp ta jumys júrgizerlik jaǵdai jasalmaq. Sonymen qatar byltyr granttyq qarjylandyrý da halyqtan zor qoldaý tapty. Iaǵni memleket alǵashqy biznesti ashý úshin grant bóledi. Bul baǵytta jarqyn úlgiler barshylyq. Byltyr granttar 100 AEK-ten bastalsa, biyl tek 200 AEK-ten (505 myń teńge) beriletin boldy. Iaǵni aýyldaǵy áielderge óz biznesin júrgizý úshin – bul óte jaqsy soma. Iaǵni bul rette memleket otbasylarǵa qaitarymsyz kómek berip otyr», - dedi ol.
Erbolat Abýlhatin kópbalaly jáne az qamtylǵan otbasylar osy grantty kásipkerliktiń negizin oqymai-aq alatynyn eske salyp ótti.
«Eńbek jáne halyqty áleýmettik qorǵaý ministrligi áleýmettik kásipkerlikti damytý úshin úkimettik emes uiymdarmen birlese jumys júrgizýde. Iaǵni áleýmettik kásipkerlikti damytý úshin jumysqa az qamtylǵan jáne kópbalaly otbasylardy, múmkindigi shekteýli jandardy tartqymyz keledi. Olarǵa biznespen ainalysyp, tabysyn arttyrýǵa múmkindikter barshylyq. Osy baǵytta «Jasyl ekonomikany» qoldaý jáne G-Global-dy damytý koalitsiiasymen seriktese jumysty bastap kettik», - dedi ol.
