Foto: ashyq derekkóz
Qazaqstandyq belgili akter Bolat Ábdilmanov jaqynda shyqqan otandyq filmge qatysty pikir bildirip, jurtshylyq arasynda qyzý talqy týdyrdy. Óner iesi kinodaǵy áielder men erlerdiń róli aýysyp bara jatqanyna kóńili tolmaitynyn aitty, dep habarlaidy Ult.kz.
Akter bul filmde er adamdardy áielderge tolyqtai baǵynyshty etip kórsetkenine narazylyǵyn bildirdi. Óz oiyn Bolat Ábdilmanov Instagram paraqshasynda bólisti.
Akterdiń syny qazaqstandyq "Jeztyrnaq" filmine qatysty. Óner iesi filmniń kórkemdik deńgeiine daý joq ekenin aitady.
"Kinonyń jetistikteri, jalpy tartymdylyǵy kásibi deńgeide. Oǵan daý joq. Akterlerdiń oiyny, kadrdan kadrǵa aýysýy, búkil bet-pishin, kózqarasy bári óz ornynda. Akterlik ansambl bar, Dosjan Janbotaevtan bastap, Qarabalinder, jas bala, basty róldi oinaǵan qyz da, bári de óz ornynda, sendirdi. Operatordyń da jumysy óte jaqsy, rejisser da akterlermen jumys istei alǵan, tapsyrma durys qoia biledi, akterler de óz rólderine sai kelip tur", - dep bastady áńgimesin akter.
Alaida ol filmniń mazmuny, ideiasynda oilanatyn dúnie bar deidi.
"Bul kinoda áielder bárin qyryp salady, erkekter bir júrgen sorly. Erkek emes, telpek, jigit emes, milik. Áielderdiń aitqanynan shyǵa almaidy, áieldiń óziniń barlyq fizikalyq kúshin kórsetip, sol jerde jeńimpaz bolady", - deidi Ábdilmanov.
Ábdilmanov búginde áielder men er adamdardyń orny aýysyp bara jatqanyn tilge tiek etti.
"Áieldiń qarýy onyń kúshi me? Áieldiń qarýy - júreginiń jumsaqtyǵy, náziktigi, sabyrlyǵy, aqyldylyǵynda emes pe? Áiel zatynyń kóz jasynyń aldynda erimeitin qara tas joq. Kez kelgen erkek áieldiń aldynda onyń álsizdigin kórgendikten ony qurmetteidi, qadirleidi. Al endi qazir áiel men erkektiń orny aýysyp bara jatqan sekildi. Otbasynda áieldiń basshy bolýy, erteń memleketti de áiel basqarady degenge ákelip tur. Endi ózderińiz oilańyzdar. Osy jerdi qorǵaityn balany rýhty, namysty, minezdi urpaq qylyp qalai tárbieleimiz. Mektepke keledi, mekteptiń kóbi, ustazdardyń 70-80 paiyzy áiel adamdar. Bizdiń el búginde ajyrasýdan aldyńǵy ondyqqa kiredi. Ákesiz, anasynyń qolynda, áieldiń tárbiesimen ósken balalar, mektepte de sol" , - dep narazylyǵyn jetkizdi.
Sonymen qatar óner iesi kino salasynda da oilanatyn, ózgertetin kóptegen dúnieler bar ekenin alǵa tartty.
"Endi kinoǵa keletin bolsaq, kino degen kórkem dúnie ǵoi, ol bir memleketshildikke, eldikke, patriottyq sezimdi oiatyp, elin-jerin qorǵaityn, rýhty azamattardy tárbieleitin oryn dep oilaimyn. Al bul jerde de sol áiel beleń alyp, ústemdik qoiyp júr. Jalpy áiel ejelden, ata-babamyzdan kele jatqan dástúr boiynsha otanasy, úidiń shamshyraǵy, jary kelgende tamaǵyn daiyndap, úiin taza ustap, jyly qabaqpen kúlimsirep qarsy alady. Erteń kúieýi úlken biikterdi baǵyndyratyn kezde oǵan bir demeý, motivatsiia berý. Erkek - dúniedegi barlyq isin áiel zatyna dáleldeý úshin jasaidy ǵoi. Sondyqtan áiel men er adam óz ornynda bolsa bizdiń qoǵam da, memleket te damidy dep oilaimyn. Qazir kóptegen filmderdi jekemenshik stýdiialar túsiredi, endi olar aqsha ózimizdiki dep, neshe túrli dúnie túsiredi. Osyǵan bailanysty kino salasynda da oilanatyn kóp dúnie bar. Meniń kinoǵa aitar pikirim – osy" , - dep túiindedi Bolat Ábdilmanov.
