Foto: Konstitýtsiialyq sottyq baspasóz qyzmeti
Májilis depýtaty A. Sarym «Qazaqstan Respýblikasynyń Quryltaiy jáne onyń depýtattarynyń mártebesi týraly» Konstitýtsiialyq zań jobasy boiynsha baiandama jasady. Qujat birinshi oqylymda qaralyp jatyr, dep habarlaidy Ult.kz.
Depýtattyń aitýynsha, zań jobasy jańa Konstitýtsiia normalaryn iske asyrý maqsatynda ázirlengen. Negizgi maqsat – birpalataly Quryltaidyń konstitýtsiialyq-quqyqtyq negizin qalyptastyrý.
Baiandamada Quryltai uǵymynyń tarihi tamyry tereń ekeni atap ótildi. Ol halyq biliginiń bastaýy retinde baǵalanyp, qazaq tarihyndaǵy mańyzdy sheshimder Quryltai aiasynda qabyldanǵany aityldy.
«Qazirgi Quryltai – tarihi institýttyń kóshirmesi emes, zań shyǵarýshy bilikti júzege asyratyn jańa zamanǵy ókildi organ», – dedi depýtat.
Jańa modelge sáikes, Quryltai 145 depýtattan turady. Olar proportsionaldy júie boiynsha 5 jyl merzimge sailanady. Sonymen qatar onyń zań shyǵarý, memlekettik organdardy qalyptastyrýǵa qatysý jáne parlamenttik baqylaý fýnktsiialary bekitiledi.
Quryltai qyzmeti sessiialar, otyrystar, tyńdaýlar jáne úkimet saǵattary formatynda júzege asady. Tóraǵa, Biýro, komitetter men komissiialar qurylymy da zańmen aiqyndalady.
Depýtattyń aitýynsha, birpalataly júie zań shyǵarý protsesin jedeldetip, ashyqtyq pen jaýapkershilikti kúsheitedi. Sondai-aq halyqaralyq tájiribede mundai modeldiń keń taralǵany atap ótildi.
Zań jobasynda Quryltaidyń Úkimetpen ózara is-qimyly, depýtattardyń mártebesi, quqyqtary men mindetteri de naqty kórsetilgen. Sonymen birge Quryltai Parlamenttiń quqyqtyq mirasqory retinde belgilenedi.
Qujat qabyldanǵan jaǵdaida, zań 2026 jylǵy 1 shildeden bastap kúshine enedi. Buǵan deiingi Parlament pen onyń qyzmetin retteitin zańdar óz kúshin joiady.
Baiandama sońynda depýtat áriptesterdi zań jobasyn qoldaýǵa shaqyrdy.
