Foto: Halyqstan.kz
Jańa jyl qarsańynda Aqmola oblysynyń Stepnogorsk qalasynda kóshelerge dástúrli túrde Aiaz ata men Aqshaqar músinderi ornatyldy. Alaida merekelik bezendirý qala turǵyndary kútkendei jaǵymdy áser qaldyrmai, kerisinshe áleýmettik jelilerde qyzý talqylaýǵa ulasty, dep habarlaidy Ult.kz Stan.kz saityna silteme jasap.
Erekshe pishindegi jańa jyldyq músinderdiń sýretteri men videolary jelide taralyp, turǵyndar olardyń syrt kelbeti úrei týǵyzatynyn jazdy. Keibir jeli qoldanýshylary Aiaz ata men Aqshaqar tún qarańǵysynda baltamen shabylǵandai áser qaldyratynyn, al ózge músinder sol «shyǵarmashylyq úderistiń» kezdeisoq kýágerlerine uqsaitynyn atap ótti. Sondai-aq turǵyndar merekelik bezendirýge 10 million teńgeden astam qarjy jumsaldy degen aqparatty alǵa tartyp, narazylyq bildirdi.
Qoǵamdyq rezonansqa qala ákimdigi jedel jaýap berdi. Stepnogorsk qalasy ákiminiń orynbasary Darhan Ospanovtyń aitýynsha, biyl qalada burynnan bar dástúrdi qaita jandandyrý týraly sheshim qabyldanyp, túrli uiymdarǵa jańa jyldyq alańdy óz bastamasymen bezendirýge múmkindik berilgen.
– Aiaz ata, Aqshaqar jáne basqa da shaǵyn sáýlet formalary uiymdardyń bastamasymen ornatyldy, – dedi ol.
Ákimdik ókilderiniń málimetinshe, atalǵan bezendirýge qala biýdjetinen qarajat bólinbegen. Sonymen qatar turǵyndardyń syny eskerilip, estetikalyq talaptarǵa sai kelmegen músinderdi alyp tastaý týraly sheshim qabyldanǵan.
– Qala turǵyndarynyń kóńilinen shyǵatyn, barlyq talapqa sai jańa jyldyq alań jasalady. Týyndaǵan jaǵdai úshin keshirim suraimyz, – dedi ákimdik ókili.
