Májilis depýtat Gúlnár Bijanova Premer-ministr Asqar Maminge aýyldarǵa veterinarlyq dárigerler jetispeýshiliginen virýstyq aýrýlar kóbeiip jatqanyn aityp, saýal joldady, dep habarlaidy Baq.kz agentigi.
Sailaýaldy kompaniia kezindegi kezdesýler barysynda Qaraǵandy óńiriniń árbir aýylynda turǵyndar veterinarlyq dárigerler men veterinarlyq pýnktterdiń joqtyǵy máselesin kóterdi. Osyǵan uqsas suraýlar basqa aimaqtardyń ókilderinen maǵan Facebook paraqshama birneshe ret jiberildi, - deidi depýtat.
Ol bul másele jańa týyndaǵan másele emes. Kóptegen qaita qurýlar nátijesinde qaýipti infektsiialarmen kúresý úshin aldyńǵy qatarda turǵan aýyldyq veterinariia quldyrady. Elimizde mezgil saiyn adam ómiri úshin qaýipti juqpaly aýrýlardyń órshýi bolyp jatyr dep dabyl qaqty.
Mysaly, osy jyldyń jazynda nodýliarlyq dermatit dep atalatyn virýstyq aýrýdan iri qara maldyń edáýir bóligi qyryldy. Biyl da jylqylar aiaqty shiritip jiberetin virýstyq aýrýǵa shaldyqty. Mundai maldyń eti erteń dastarqannan oryn alýy ábden múmkin! Onyń saldary qandai bolatynyn boljaý da qiyn… «Bastaý biznes» baǵdarlamasyna kredit berýge baǵyttalǵan qarajattyń negizgi kólemi naq aýyldyq jerlerde igerilip jatqanyn erekshe atap ótken jón. Negizinen, jeke isin damytý úshin mal satyp alynady. Ózderińiz biletindei, qaryz qarajatyn paiyzben qaitarý kerek, - deidi Bijanova.
Ol memleket aýyldarda óz isin ashýǵa múmkindik beredi. Biraq sonymen birge onyń damýy úshin jetkilikti jaǵdailar jasalmaidy. Aýyldyq veterinariia máselelerindegi iri kemshilikter, kerisinshe, jobanyń kóptegen qatysýshysy qaryzdyq quldyqqa túsýine yqpal etedi dep otyr.
Qazirgi ýaqytta veterinardyń belgili bir mártebesi de joq. Jalaqy tómen, naqty eńbek kúshine, qaýiptiligine sáikes kelmeidi. Qyzmetter baǵasynyń biryńǵai preiskýranttary da qarastyrylmaǵan. Jumys úshin qarapaiym jaǵdailar jasalmaǵan.
Mysaly, Qaraǵandy oblysynda byltyr jyl basyndaǵy jaǵdai boiynsha aýyldyq okrýgterdiń 90%-ynda tiisti infraqurylymy bar vetpýnkt ǵimarattary joq. Bul máseleni Aýyl sharýashylyǵy ministrliginiń de, Úkimettiń de aldyna birneshe ret qoidyq. Alaida, qabyldanǵan sharalar jetkiliksiz, - deidi depýtat.
Osy máseleni Úkimet aldynda qaita kótere otyryp, mynandai sheshimderdi usynatynyn jetkizdi:
Birinshi. Veterinariialyq dárigerlerdi azamattyq qyzmetshiler tizbesine engizý.
Ekinshi. Aýyldyq, kenttik okrýgter ákimdikteriniń deńgeiinde memlekettik qyzmet kórsetý úshin memlekettik veterinariialyq dárigerlerdiń shtat birlikterin bólý.
Úshinshi. Dárigerlerge arnalǵan júktemeniń biryńǵai normasy men veterinariialyq manipýliatsiialar júrgizýge arnalǵan baǵalardyń biryńǵai preiskýranty máselesin qaraý.
