Almaty qalasynyń Medeý aýdandyq politsiia bóliminiń ýchaskelik politsiia qyzmetkeri Ulan Ohanov 31 arnanyń “Informbiýro” aqparattyq baǵdarlamasynyń tilshilerine suhbat berdi. Ol qaladaǵy Tóle bi men Baitursynov kósheleriniń qiylysynda adamdardy qýyp júrip qaqqan kólikten zardap shegip, aiaýsyz soqqyǵa jyǵylǵan, – dep habarlaidy Polisia.kz.
Ulan Ohanovtyń aitýynsha, quqyq qorǵaý qyzmetkerleri art jaqtan kelgen áskeri kólikti kómekke kelgen áriptesteri eken dep oilaǵan.
“Alystan qaraǵanda kólik tizgininde qara kiim kigen adam otyrǵanyn kórip, óz qyzmetkerimiz dep oiladyq. Soqqydan ushyp kettim. Turaiyn desem, tobyǵym taiyp ketken eken, aiaǵymdy kórip, talyp qaldym”, – deidi Ulan Ohanov.
Osydan keiin Ulandy áriptes eki dosy joldyń shetine shyǵaryp, aǵashqa súiegen.
“Tastap ketińder, júrýge shamam joq” dep aityp úlgerdim. Taǵy bir esimdi jiǵanda baiqaǵanym, formamnan súiregen áldekimder sol mańda ornalasqan “Halyq bank” ǵimaratynyń ishine qarai apara jatyr eken. Ol jaqta politsiia qyzmetkerleri men áskerilerdi jabylyp uryp jatty. “Kiimińdi shesh” dep jatqanyn, bir úlken kisiniń “qazaqtyń balasy ǵoi, tiispeńder” dep júgirip, jylap júrgenin kórdim. Biraq ony úlken kisi dep tyńdap jatqan eshkim joq”, – dep esine aldy politsiia qyzmetkeri.
Ulan Ohanov soqqydan esinen tanyp, aýrýhanada ǵana óz-ózine kelgen. Dárigerler onyń oń aiaǵynyń birneshe jerine temir salyp, ota jasaǵan. Oǵan qosa miy shaiqalyp, sol qolynan jaraqat alǵanyn aitty. Ol aýrahanada jatqan 15 kúnde 15 keli salmaq joǵaltqan. Ulan ózin emdeý mekemesine aparǵan belgisiz azamatqa alǵysyn bildirdi.
IIM Tergeý departamentiniń tóraǵasy Sanjar Ádilovtyń aitýynsha, qańtar oqiǵasy kezinde jalpy sany 3 myńnan astam áskeri, quqyq qorǵaý salasynyń qyzmetkerleri túrli jaraqattarmen aýrýhanaǵa túsken.
“Olardyń keibiri qyzmetine orala almaidy, múgedek bolyp qaldy”, – dedi IIM Tergeý departamentiniń tóraǵasy.
