الماتى قالاسىنىڭ مەدەۋ اۋداندىق پوليتسييا بٶلٸمٸنٸڭ ۋچاسكەلٸك پوليتسييا قىزمەتكەرٸ ۇلان وحانوۆ 31 ارنانىڭ “ينفورمبيۋرو” اقپاراتتىق باعدارلاماسىنىڭ تٸلشٸلەرٸنە سۇحبات بەردٸ. ول قالاداعى تٶلە بي مەن بايتۇرسىنوۆ كٶشەلەرٸنٸڭ قيىلىسىندا ادامداردى قۋىپ جٷرٸپ قاققان كٶلٸكتەن زارداپ شەگٸپ, اياۋسىز سوققىعا جىعىلعان, – دەپ حابارلايدى Polisia.kz.
ۇلان وحانوۆتىڭ ايتۋىنشا, قۇقىق قورعاۋ قىزمەتكەرلەرٸ ارت جاقتان كەلگەن ەسكەري كٶلٸكتٸ كٶمەككە كەلگەن ەرٸپتەستەرٸ ەكەن دەپ ويلاعان.
“الىستان قاراعاندا كٶلٸك تٸزگٸنٸندە قارا كيٸم كيگەن ادام وتىرعانىن كٶرٸپ, ٶز قىزمەتكەرٸمٸز دەپ ويلادىق. سوققىدان ۇشىپ كەتتٸم. تۇرايىن دەسەم, توبىعىم تايىپ كەتكەن ەكەن, اياعىمدى كٶرٸپ, تالىپ قالدىم”, – دەيدٸ ۇلان وحانوۆ.
وسىدان كەيٸن ۇلاندى ەرٸپتەس ەكٸ دوسى جولدىڭ شەتٸنە شىعارىپ, اعاشقا سٷيەگەن.
“تاستاپ كەتٸڭدەر, جٷرۋگە شامام جوق” دەپ ايتىپ ٷلگەردٸم. تاعى بٸر ەسٸمدٸ جيعاندا بايقاعانىم, فورمامنان سٷيرەگەن ەلدەكٸمدەر سول ماڭدا ورنالاسقان “حالىق بانك” عيماراتىنىڭ ٸشٸنە قاراي اپارا جاتىر ەكەن. ول جاقتا پوليتسييا قىزمەتكەرلەرٸ مەن ەسكەريلەردٸ جابىلىپ ۇرىپ جاتتى. “كيٸمٸڭدٸ شەش” دەپ جاتقانىن, بٸر ٷلكەن كٸسٸنٸڭ “قازاقتىڭ بالاسى عوي, تيٸسپەڭدەر” دەپ جٷگٸرٸپ, جىلاپ جٷرگەنٸن كٶردٸم. بٸراق ونى ٷلكەن كٸسٸ دەپ تىڭداپ جاتقان ەشكٸم جوق”, – دەپ ەسٸنە الدى پوليتسييا قىزمەتكەرٸ.
ۇلان وحانوۆ سوققىدان ەسٸنەن تانىپ, اۋرۋحانادا عانا ٶز-ٶزٸنە كەلگەن. دەرٸگەرلەر ونىڭ وڭ اياعىنىڭ بٸرنەشە جەرٸنە تەمٸر سالىپ, وتا جاساعان. وعان قوسا ميى شايقالىپ, سول قولىنان جاراقات العانىن ايتتى. ول اۋراحانادا جاتقان 15 كٷندە 15 كەلٸ سالماق جوعالتقان. ۇلان ٶزٸن ەمدەۋ مەكەمەسٸنە اپارعان بەلگٸسٸز ازاماتقا العىسىن بٸلدٸردٸ.
ٸٸم تەرگەۋ دەپارتامەنتٸنٸڭ تٶراعاسى سانجار ەدٸلوۆتىڭ ايتۋىنشا, قاڭتار وقيعاسى كەزٸندە جالپى سانى 3 مىڭنان استام ەسكەري, قۇقىق قورعاۋ سالاسىنىڭ قىزمەتكەرلەرٸ تٷرلٸ جاراقاتتارمەن اۋرۋحاناعا تٷسكەن.
“ولاردىڭ كەيبٸرٸ قىزمەتٸنە ورالا المايدى, مٷگەدەك بولىپ قالدى”, – دەدٸ ٸٸم تەرگەۋ دەپارتامەنتٸنٸڭ تٶراعاسى.
