Mariia Áýezova Everest shyńyna shyǵyp, 5 myń metrden astam biiktiktegi bazalyq lagerge jetti. Alpinist qyz aiaǵy joq bolsa da, taý shyńyn baǵyndyrdy. Bul týraly ol óziniń Instagram-daǵy paraqshasynda habarlady.
«Bizge bul maqsatqa jetý múmkin emestigin aitqandar boldy. Biraq biz maqsatymyzdy oryndadyq! Qiyn joldy eńsere aldyq! Aǵzaǵa túsken aýyrpalyqty, sýyqty eńserip, bastaǵan isimizdi jeńispen aiaqtadyq! Ózimizdiń múmkindigimizdi kórsetip, úrei men senimsizdikti jeńdik! Endigi maqsat – protezge turyp, osy joldy qaita júrip ótý», - dep jazdy elorda turǵyny Mariia Áýezova.
Belgili bolǵandai, Qazaqstan azamattarynan quralǵan ekspeditsiia 10 kúnge jalǵasqan, 5364 metr biiktiktegi bazalyq lagerge jetken. Olar kúnine ortasha eseppen 300 metr eńserip otyrǵan.
Ekspeditsiia sapyndaǵy tájiribeli alpinist Vadim Tshe qoldaý jasaǵan barsha adamǵa óz alǵysyn aitty. Osy oraida ol tártip pen qajyrly eńbek, armandy oryndaýdaǵy maqsat arqyly Mariia jetistikke jetkenin atap ótti.
Everestiń 8 848 metr biiktiktegi shyńyna Soltústik jáne Ońtústik baǵyttarymen shyǵýǵa bolady. Soltústik baǵdar Tibet aýmaǵynda, al ońtústik baǵdar Nepal jaqta ornalasqan. Atap aitqanda, Soltústik bazalyq lageri 5150 metr, Ońtústik bazalyq lageri 5 364 metr biiktikte tur. Mariia Áýezova osy ońtústik baǵyttaǵy lagerge jetti.
