Jazýshy Aiagúl Mantaidyń "Soqyr sana" atty jańa áńgimesin nazarlaryńyzǵa usynamyz.
1
Qara sýyqtan qaltyrap, metronyń kire berisinde gúl satyp, búkir kempir tur. Gúldiń bárin satyp alyp, ony sýyqtan qorǵaǵym kelgen. «Ózime ózim gúl syilap, sezimderimdi aldaǵym kelmeidi. Óz sezimderimen oinaǵan adamnyń mahabbatta joly bolmaidy» dep gúl satyp alý týraly oiymnan ainyp qaldym.
Kempirdiń qasynda álem juldyzdarynyń beinesin eske túsiretin qýyrshaq satyp, orta jastaǵy etjeńdi áiel otyr. Baiǵus áiel sýyqtan tońǵany sondai, kúrteshesiniń úlken qaltasyna qolyn tyǵyp, jylylyq izdeidi. Bul áieldiń ómirinde jylylyq bolyp pa ózi? Eger qýyrshaǵyn satyp alsam, oǵan kishkentai jylylyq syilar edim. «Kishkentai qyzym joq, qýyrshaqty nesine satyp alam?» dep ol oiymnan da ainyp qaldym.
Eki áielden on metr qashyqtyqta án aityp turǵan zaǵip qyzdyń qasynan ótkende qulaǵymdy aiadym. Tym ashy, «baqyrǵan baqa daýys» qulaǵymnyń perdesin jyrtatyndai oǵan jaratpai qaradym. Ony kórgen saiyn «Baiǵus-ai, adamdar saǵan óneriń úshin emes, múgedektigiń úshin aqsha tastaidy, baqyrmashy» dep aitqym kelip, irkilip qalam.
«Men baqytty áielmin» dep jymiyp, án shyrqap turǵan soqyr qyzdyń jaǵymsyz daýsy burynǵydai boiymda titirkený sezimin oiatqan joq. Qasyna baryp, onyń tolyq dóńgelek betin, ajaryn buzyp turǵan qusmurnyn, ájimdi mańdaiyn, beikúná kózderin zerttep, únsiz tyńdap turdym. «Eger kózi kórgende ainaǵa ár qaraǵan saiyn murnyna kóńili tolmai, jylar edi» dep oiladym.
– Siz kimsiz? – dep ol úrke surady.
– Sizdiń janyńyzda bir tynyshtyq bar eken. Al men tirshilik tarazysyn tarazylai alar emespin, – dedim onyń suraǵyn jaýapsyz qaldyryp.
– Qudai meniń kózimdi alyp, janymdy nurmen bólegen, – dedi ol jyly jymiyp.
Odan mundai jaýap kútpegendikten, qapelimde aýzyma sóz túspedi. Osy sátte onyń sózin rastaǵandai beti erekshe nurlanyp tur edi.
– Saý bolyńyz, – dedim.
– Toqtai turyńyzshy, – dep qolymdy taýyp alyp, qatty qysty. Oń alaqanymdy eki qolymen kezek-kezek uzaq sipady.
– Tym sezimtal adam ekensiz, bárin de júregińizge jaqyn qabyldaisyz. Eger men sizdiń ornyńyzda bolsam, myna álemdi kóre alsam, ózimdi erekshe baqytty seziner edim, – dep jai kúrsindi.
– Meniń de basqa adamnyń ómirimen ómir súrgim keletin kezderim bolady, – dep shynymdy aittym.
– Qanaǵatsyzdyq – bul óte úlken kúná. Sizdiń kózińiz kóredi ǵoi, – dep orys qyz maǵan shoshyna qarady. – Siz kóbelektiń gúlge qalai qonǵanyn, qustyń qanatyn jaiyp ushqanyn kóre alasyz. Siz appaq ulpa qardyń aspannan jerge qalai qonaqtap jatqanyn kóre alasyz. Men jańbyrdyń astynda júrsem ǵana, qar betime kelip, qonaqtasa ǵana onyń qalai jaýyp jatqanyn sezem. Meniń kózim eshqashan kórmeitinin bilem, biraq men myna álemdi bir-aq ret kórgim keledi. Qudai maǵan janarymnyń nuryn bir saǵatqa syilasa, ózimdi, adamdardy, balalardyń kúlkisin, tabiǵattyń sulýlyǵyn, meiirimniń beinesin, bárin-bárin kórer edim.
– Meiirimniń beinesin deisiz be? – dep men odan tańdana suradym.
– Iá, meiirimniń beinesin kórer edim, – dedi ol erekshe senimdi daýyspen. – Maǵan ylǵi bir áiel kelip, meiirlenip, sadaqa beredi. Onyń jalǵyz uly múgedek eken. Maǵan qaiyrymdylyq jasap, Jaratqannan óz balasyna densaýlyq suraidy. Sol meiirimdi áieldiń beinesin kórgim keledi, – dedi ol.
– Sizdiń júzińiz sondai jyly, meiirimdi, – dedim.
– Ras pa? – dep ol uiala kúlimsiredi. – Taǵdyrym jymiyp qaramasa da, men ómirge kúlip qaraǵym keledi. Ómirden mán tabý úshin de, ómirdi súiem. Kún saiyn ózimnen artylǵan tamaqty kórshi kempirge aparyp berem. Ol kóshege shyǵyp, qaiyr tileýge de jaramaidy. Tórt jyldan beri tósek tartyp jatyr, – dep kórshisiniń kezinde ózine kóp kómegi tigenin aityp jatqanda esime oǵan sadaqa bermegenim tústi.
Búkil ǵalamnyń suraqtaryna sol ǵana jaýap bere alatyndai úmitpen:
– Jany muńǵa jaqyn adam ómirden mán tabý úshin ne isteýi kerek? – dep suradym.
– On eki múshesi saý adamdardyń ómirdi súimeýge esh qaqysy joq! – dedi ol qabaǵyn túiip.
– Kóktem bolsa da – kóktemniń isin sezbeitin, jaz bolsa da – jadyramaityn, qys bolsa da – qardyń aqtyǵyn kórmeitin, kúz bolsa da – kúzdiń sulýlyǵyn júrek kózinen ótkize almaityn qanshama júregi soqyr adam bar. Olardyń táni – caý, biraq jany – múgedek, – dedim jylaǵym kelip.
– Analyq sezim ǵana áieldi qutqarady. Sábidiń isin qatty saǵyndym, – dedi ol aýany qushyrlana iiskep. – Ana bolǵym keledi. Sábiimdi kóre almasam da, onyń meni kóretinin oilasam, janym erekshe qýanyshqa bólenedi, – dep qiialǵa shomdy.
«Múgedek bola tura, ol da ana bolǵysy keledi».
Ol meniń oiymdy oqyp qoiǵandai: – Balam – meniń qos janarym bolady, – dedi.
– Áiel balany ózi úshin, óziniń «Mendigin» qanaǵattandyrý úshin týmaýy kerek. Ózin-ózi qutqarý úshin dúniege bala ákeletin áielderdi túsinbeimin, – dedim dóreki ún qatyp.
Ol sózimdi jaratpaǵanyn kórsetip, qabaǵyn túidi.
– Balam anasy sekildi ómirdi sheksiz jaqsy kóretinine kúmánim joq. Ol ár atqan tań men ár batqan kúnge qarap, Jaratqanǵa alǵys aityp, duǵa oqityn bolady, – dedi senimdi daýyspen.
«Balańnyń kózi kórmeidi dep qoryqpaisyń ba?» dep suraýǵa oqtaldym da, onyń júzinen qýanyshtyń sáýlesin kórip, irkilip qaldym.
Jaýraǵanymdy syltaýratyp, men onymen asyǵys qoshtastym. Dala qarańǵylyq qushaǵyna sińip bara jatty. Ózim turatyn jataqhanaǵa qarai jaiaý bettedim. Aldymda jaralanǵan aiaǵyn basa almai, qardy qyzyl qanǵa boiap, qara it ketip barady. It menen uzap ta ketpedi, qalyp ta ketpedi. Anda-sanda artyna burylyp qarap qoiady.
– Keshir, sen túgili, ózimdi de túsine almaimyn, – dedim it meniń sózimdi túsinetindei kúrsinip.
2
Iship otyrǵan shaiyma taraqan túsip ketti. Yzalanǵanym sondai qurbym kinálidei shaidy betine shashyp jibergim keldi. «Salaqsyń! Bólmeni eshqashan jinamaisyń» dep aiqai saldym. Ol murnynyń astynan «Bul jataqhanada taraqan qaptaǵanyna bir jyldan asty. Edendi kúnine úsh mezgil jýsań da, olardan qutyla almaisyń» dep mińgirledi. «Júikeni tynyshtandyrady» dep jarnamasy jaqsy jasalǵan «Tsikoriidiń» úsh qasyǵyn kesege salyp, ishe bastap edim, denem titirkenip ketti. Tilime jabysqan taraqannyń óli balasy edi. «Bulai kedeishilikte ómir súrgenshe, ólip qalǵanym jaqsy edi» dep bar daýsymmen aiqai saldym.
Ol: – Jurttar shaian men qurbaqany da jeidi ǵoi. Onyń qasynda kishkentai taraqandy juta salǵannan ólip qalmaisyń, – dep kelemejdedi.
Ózin-ózi, shyn máninde, syilai biletin, jaqsy ómir úshin kúrese biletin jigerli adam úsh kún turmaityn bizdiń qaladaǵy kishkentai bólmemiz tym jupyny. Terezeni ashsaq, ár jerinen jyrtylyp, ajyraǵan qońyr tús qaǵazdar jelbireidi. «Kim bolsa da, myna tús qaǵazdy talǵamsyz adam tańdaǵan» dep kúńkildegenimizben, onsyz da kóńilsiz ómirimizdi onan saiyn kólegeilep tastaǵan bólmeni aqtap, syrlaý eshqaisymyzdyń oiymyzǵa kirip shyqpady. «Basqa páterge kóshem». Ekeýmiz de solai oiladyq. Biraq biz kóshpei, sol eski jataqhanada turaqtap qaldyq.
Keide taraqandardyń tósegimde, betimde júgirip júretinin kótere almai, júikem shekten tys qozyp, túnniń bir ýaǵynda turyp alyp, olardy órshelene óltiretinim bar.
Aiza: – Jaýyzsyń! Olar da Alla jaratqan tirshilik ieleri. Olardyń da ómir súrýge quqy bar, – dep ursady.
– Tym aqyldy ekensiń. Onda olarǵa túsindir, jep otyrǵan tamaǵym men iship otyrǵan shaiyma túsip, meniń júikemmen oinamasyn.
– Sende shizofreniianyń belgileri bar. Júike aýrýlaryn emdeitin aýrýhanaǵa jatqyń kelmei me? Erteń aparyp tastaiyn, – dedi ol mysqyldap. – Jataqhanaǵa ai saiyn aqsha tólemeisiń, úsh mezgil tegin tamaq, ári onda taraqan da joq, keremet qoi, tipti, demalys orny dersiń, oilanyp kór, – dep ájýalap kúldi.
– Sende de júike aýrýlarynyń belgileri bar. Ekeýmiz birge emdeleiik, –dedim jaratpai.
– Joq, meniń júikem sap-saý, tek sońǵy kezde qatty sharshadym, biraz demalsam, ózime kelem, – dedi ol sharshaǵan daýyspen. – Al saǵan «psihbálnisaǵa» jatam deseń, kómektesem, – dep mazaqtap, quddy bir taýyp sóilegendei óz sózine ózi máz bolyp, kúlip aldy.
Men onyń kúlkisiniń astarynda muń jasyrynyp turatynyn bilem. Sosyn ol jónsiz qaljyńdasa da, renjimeýge tyrysam. Ol ákesi men anasynyń ajyrasyp ketkenin, qazir ekeýiniń de óz otbasy bar ekenin, ákesiniń eshqashan ózin izdemegenin, ógei ákesiniń jek kórý sezimin sezinip óskenin jasyrǵan emes. Ákem men anam kezek-kezek telefon shalyp jatsa, «jurttyń áke-sheshesi qyzdaryn izdeidi, al men eshkimge kerek emespin» dep burqyldap, sóilep qalatyny bar. Ózi sheshesine óte sirek telefon shalady. Biraq ekeýiniń áńgimesi ylǵi da uryspen bastalyp, uryspen aiaqtalady.
– Aiza, metronyń qasynda qaiyr surap turatyn soqyr qyzdy bilesiń ǵoi. Búgin sol qyzben uzaq sóilestim, – dedim.
– Baqytsyz baiǵuspen sóilesip, ózińdi bir sát baqytty sezinip, jeńildep qaldyń ba? – dep kekete kúldi.
– Áiteýir sen-aq keketip, muqatqanǵa shebersiń, – dedim jaratpai.
– Meni Sábirany saǵynyp, izdeidi deisiń be? Ózim jarymai júrip, oǵan jii syilyq jasaýymnyń sebebi: qaiyrymdylyq kórsetip, Qudaidan sharapat kútý emes, múgedek qyzdyń ómirge degen qushtarlyǵyn zertteý, bir tynysh tappaityn janymnyń qanaǵatsyzdyǵyn tunshyqtyrý. Bul – basqanyń qaiǵysynan baqyt izdeý emes, ózińdegi bardy baǵalap, táýbege kelý, – dedi Aiza.
– Qudai múgedek, qarip-qasirlerdi saý, biraq rýhani adamdar kúsh-qýat, energiia alsyn dep jaratqan demeksiń be? Eger solai bolsa, bul qanshalyqty ádiletti? – dep oǵan da, ózime de suraq qoidym.
– Eńsemdi aýyr muń basqanda aýrý, múgedek jandarǵa qarap ta, táýbeme kelip, shúkirshilik ete almaimyn. Meiirimge qanyp ósken balalar myna álemge mahabbatpen qaraidy. Olar ómir súrý erejesin biledi. Ana men áke meiirimine bólenbegen balalar qoǵamnan ózin-ózi shettetip, tuiyqtalyp, buiyǵy ómir súredi, – dedi ol.
– Al sen ómirden óz úlesińdi alý úshin óz erejeńmen oina! «Bala kezde balalyq shaǵym bolmady» dep búkil ómirińdi sary ýaiymmen, jylaýmen ótkizbeksiń be? – dedim men odan qatty sharshaǵanymdy jasyrmai.
– Ómir degenimiz – erejesiz kúres pe sonda? – dep myrs etti.
– Ómir degenimiz – «bar» men «joqtyń» arasyndaǵy balansty saqtaý, – dedim men ádettegi jaýabymdy qaitalap.
Ol: – Erteń Sábiraǵa kimeitin kiimderimdi aparyp beremin. Barasyń ba? – dep betime suraýly júzben qarady.
Biz kúlkisiniń astarynda muń jasyrynyp tursa da, bizdi kúle alatynyna sendire alatyn qyzǵa birge barýǵa kelistik.
3
Bir aiaǵy bir aiaǵynan qysqa, denesiniń «egiz múshesi» teńese almai, bir jaǵyna qisalańdap kele jatqan Sábiranyń qarasy kórindi.
Aiza: – Eger Qudai oǵan bailyq bergende aiaǵyna ota jasatar ma edi? Múgedek qana emes, baiǵus kedei ǵoi, – dedi oǵan aiai qarap.
Besinshi qabatqa jaiaý kóterildik.
– Sharshadyńdar ma? – dep Sábira kináli adamdai jymidy.
Ashylǵan esikpen birge murnymdy qolańsa iis pen shýash isi jelpip ótti.
Adamnyń betinen jazý oqyp úirengen ol: – Kórshilerimniń bári qara jumys isteidi. Tań atqanda ketip, úige kún batqanda keledi. Qatty sharshaǵandary sondai, keide tipti jýynýǵa da shamasy kelmeidi. Eki jerde eden jýyp júrsem de, olarǵa qaraǵanda meniń demalýǵa ýaqytym bar, – dedi azdap maqtanysh aralasqan sezimmen.
Jaǵymsyz iisten tyjyrynyp otyrsam da, ystyq shai ishkim keldi.
Dastarhan jaiyp jatyp Sábira: – Keshe jalaqymdy alyp, úige aqsha saldym, – dedi estiler-estilmes.
Biz «Qyzdar, dastarhanym jupyny bolsa, keshirińder» degen oidy aitpai túsindik.
Sábira kórshi bólmege ketkende Aiza:
– Aýrý qyzynyń ai saiyn salǵan aqshasyn jep jatqan áke-sheshesinde uiat joq eken, – dep sybyr etti.
Sábiranyń jasy jiyrma segizde bolǵanymen, aýrýdan azap shekken túri óz jasynan áldeqaida úlken kórinedi. Aqshasyn aiai ma, álde syrtqy kelbetine mán bermei me, aq shashyn jasyryp, boiaǵanyn kórmeppin.
– Aizadan estigen shyǵarsyń, jazda turmysqa shyǵam, – dedi kózinde qýanysh nury oinaǵan Sábira.
«Múgedek bolsa da, bul da ómirge qushtar. «Turmysqa shyǵam» deý – bul aitatyn sóz be edi?».
– Sábira, qansha balań bolǵanyn qalaisyń, – dedim jaman oiymdy jasyrǵym kelip, jantalasyp.
Kózinde qýanysh pen úmit oty qatar oinaǵan Sábira:
– «Kóp balam bolsa» dep armandaimyn, – dedi kúlimsirep.
Aiza áńgimege aralaspai, óz oiymen arpalysyp únsiz otyr.
Sábira nan týrap jatyp biz ákelgen eki sómkege kóz qiyǵyn jii tastap qoiady. Men sómkeden ózim buryn kigen, satyp alsam da, keiinnen jaratpai, birde-bir ret kimegen kiimderdi birinen keiin birin shyǵara bastadym.
– Júz dollarǵa alǵan myna kóilekti birde-bir ret kigen emespin, – dedim.
Bul kúlgin tús kóilekti osydan úsh jyl buryn jeti myń teńgege satyp alǵam. Keiinnen jaraspaitynyn sezdim de, satqym kelip árekettengenimmen, menen saýdager shyqpady. Úsh jyl boiy eski shkaftyń bir buryshynda jatyp, toza bastaǵan kóilektiń kóz aldymda qadiri artyp ketti de, óziniń ótirik baǵasyn qoiyp berdi.
Aizaǵa Sábiranyń qýanyshty sátterin syrttai baqylap otyrý unaitynyn sezdim de, sómkeden kiimderdi birinen keiin birin shyǵara bastadym.
Sábiranyń shattanyp turǵan júzine kirbiń túskende ony renjitip aldym ba dep, kibirtiktedim. Ol ózin kináli adamdai qipaqtap, «Jaratqan iem, Táńirim, dúnieqońyzdyǵymdy, kórseqyzarlyǵymdy keshe gór» dep kúbirledi.
Osy kezde únsiz otyrǵan Aizaǵa til bitti:
– Sábira, taǵdyryń seni synap, qinasa da, Qudaidan alystamaǵanyńa tańǵalam. Qudai seni umytsa da, sen ony eshqashan umytpadyń. Men tipti keide Qudaidyń bar ekenine kúmándanam.
– Olai deme, olai demeshi. Qudai seni jaqsy kóredi, – dedi Sábira. Sosyn: – Qudai bárimizdi jaqsy kóredi, – dep qosyp qoidy.
– Kúmánim bar, – dedi Aiza qasarysyp.
Sábira: – Kúpirlik etpe!– dep ájimdi mańdaiyn jiyryp, qabaǵyn túidi. – Men aqsham namazyn oqyp alaiyn, – dep ornynan jeńil kóterildi.
Aiza: – Sen namaz oqymasań da, jánnatqa barasyń, eger jánnat shynymen bar bolsa... – dedi.
Sábira bul joly qatty ashýlandy.
Aizaǵa jaratpai qarap: – Kúpir sóilep, shaitannyń yqpalyna túsýge bolmaidy! – dedi qatqyl daýyspen.
Qyzba minezdi Aiza Sábirany renjitip qoia ma dep ýaiymdasam da, áńgime aýanyn ózgertýge esh yqylasym soqpady.
Áp-sátte júzin muń shalǵan Aiza: – Eń alǵash ret segiz jasymda Qudaidan ákem men sheshemdi ajyrastyrmaýyn jylap suradym. Qudai meni estimedi. Qudai odan keiin de meniń daýsymdy estigen emes. Ógei ákem shapalaqpen jaǵymnan tartyp-tartyp jibergende sheshem shyryldap, meni qorǵaýdyń ornyna «Sen úshin aramyz sýyp barady» dep renjidi. Sol kúni kári emen aǵashynyń túbinde jylap otyryp, eki qanatty perishtelerdi kúttim. Olar meni ózderimen birge aspan jaqqa alyp ketedi dep sendim. Kútken perishtelerim kelmei, sharshap, aǵash túbinde uiyqtap qalyppyn. Óristen kelmegen siyryn izdep shyqqan Sániia ájei meni jetektep úige ertip keldi. Sániia ájeidiń mamamdy qatty urysqany, anam qipaqtap, «ózi de qyrsyq» dep maǵan minezdeme berip jatqany emis-emis esimde.
Dalada ósken jabaiy gúl ústin tas bassa da, ólermendenip, qyltiyp, ósip shyǵady. O bastaǵy tabiǵaty gúl bolsa da, gúl ashyp, ainalasyna estetikalyq sulýlyq syilai almaidy. Ata-anasynyń mahabbatyna bólenip óspegen balalar eseigende sol jabaiy gúlge uqsaidy.
Ómirimniń eń sátsiz kezeńderinde adam janynyń jalǵyzdyǵyn sezindim. Janym aýyryp otyryp, adam janynyń ózinen basqa eshkimge qymbat emesin túsindim, – dedi janary jasaýrap.
– Jan – Allanyń amanaty. Janymdy rýhpen nurlandyrǵym keledi, – dep Sábira bizge meiirlene qarady.
Aiza Sábirany estimegendei áńgimesin jalǵady: – Qudai synaq jibergen saiyn jasaǵan kúnálarymdy esime alyp, keshirim surap, Qudaiǵa jaqyndaýdyń ornyna, kerisinshe, bárinen sharshap, túńilip, men odan alystai túsem. Qudaidan alystaǵan saiyn ómirim kúrdelenip, ózge túgili, ózimdi ózim tanýdan qalatynymdy bilem, – dep kúrsindi
– Qudaidy alystan emes, óz júregińnen izde! Qudai bizdiń júregimizde! – dedi Sábira erekshe senimdi daýyspen.
– Jiyrma eki jasymda ómirdiń mánin ózim ǵashyq bolǵan jigitpen ǵana bailanystyrdym. Onsyz ózimdi tiri óliktei sezindim. Keiin men ony umytyp kettim. Qudaisyz ómir súre almaityndai ómir súrgim kelse de, súre alar emespin. Bir adamsyz ómir súrýdiń qanshalyqty azap ekenin bastan keshsem de, Qudaidan alys ómir súrýdiń qasiret ekenin paiymdai alar emespin. Bir kezde namazǵa da jyǵyldym. Biraq meniń namaz oqýymnyń gimnastika jasaýdan esh aiyrmashylyǵy bolmady, – dedi Aiza ózin kinálaǵan daýyspen.
– Eger qalasań, aqsham namazyn birge oqiyq, – dedi Sábira.
Aiza Sábiranyń sózin estimegendei, jaýap qatpady.
– Sátsizdik – jaman oiymnyń kórinisi bolsa da, «Qudai meni azaptaityndai saǵan ne jazdym?» dep shaǵymdanam. Men ózimdi jaratqan Qudiretten basqa eshkimge shaǵymdana almaimyn. Demek, men ony tabýym da múmkin ǵoi, – dep Aiza Sábiraǵa úmittene qarady.
– Aiza, sen ózińniń qanshalyqty baqytty ekenińdi bilmeitiniń sekildi, Qudaiǵa qanshalyqty jaqyn ekenińdi de bilmeisiń, – dep Sábira Aizany janarymen erkeletti.
– Sen de aitasyń-aý, Sábirash. Baqytty adam ómirdi sheksiz súie bilýi kerek qoi. Men baqytty bolyp týǵandarǵa qyzyqpaimyn. Baqytty adamdar ózderi ólerdei súietin ómirdiń erejelerine baǵynýdy ǵana biledi. Olardyń bar qupiiasy – sol ǵana. Ómirde joly bolmai júrip, bir kúni altyn balyq ustap alatyndardy qyzǵanam. Ómirde joly bolmaǵan adamdar birin-biri azaptap, qinap, adrenalin alady. Olarǵa ózin baqytty sezinetin adamdardyń kózqarasy qyzyq emes, – degen Aiza «meni tyńdap otyrsyńdar ma?» degendei bizge suraýly júzben qarady .
– Seni eshqashan túsine almaityn shyǵarmyn, – dep baladai kúlimsiregen Sábira namaz oqý úshin kelesi bólmege ketti.
– Seniń bolmysyńdy túsine almai baiǵus qyz ábden sharshady. Seniń bolmysyńdy túsinýden «myńjyldyq esepti» sheshý jeńil sekildi, – dep kúldim.
– Sábira Qudaidy tanymai, bilmei súiedi. Onyń jany qazirdiń ózinde rýhpen nurlanyp tur. Ekeýmiz ony sol úshin izdeimiz. Qudai men adamnyń arasyndaǵy mahabbatta saýda bolmaýy tiis. Biz ekeýmiz Qudaiǵa degen senimimizdiń óteýine birdeńe kútemiz. Janymyzdyń sharq uryp, tynyshtyq tappaýynyń sebebi sonda bolsa kerek, – dedi ol ádettegidei máńgilik saýaldarǵa jaýap izdep.
Ekeýmiz terezeni urǵylap jatqan nóser jańbyrdan kóz almai, bir-birimizge birneshe ret qoiǵan, budan keiin de qoiatyn, talai ret tańǵa deiin uiyqtamai talqylaǵan máńgilik suraqtardyń bir parasyna únsiz jaýap izdedik.
«Qudai meniń júregimde!» dep ishimnen qansha qaitalasam da, oiym shashyrap, jinaqtala almadym. Qudaimen qarym-qatynasyn eshqashan jasyrmaityn Aizadan emes, ózimdi ózimnen jasyratyn «ózimnen» qoryqtym...
Aiagúl MANTAI,
Ult portaly
