Shyǵys Qazaqstan oblysynyń Aiagóz qalasyndaǵy Balalar arnaiy áleýmettik kómek kórsetý ortalyǵynda 4 balanyń ólimine qatysty tergeý amaldary aiaqtaldy, dep habarlaidy "Ult aqparat".
ShQO politsiia departamenti baspasóz qyzmetiniń málimetinshe, vedomstvoaralyq jedel-tergeý toby oblystyq prokýratýranyń basshylyq etýimen Aiagóz qalasynda ornalasqan Balalar arnaiy áleýmettik kómek kórsetý ortalyǵynda tárbielenýshiler ólimi boiynsha sotqa deiingi tergeý júrgizgen.
Tergeý barysynda eksgýmatsiia jasalyp, eki komissiialyq sot-meditsina saraptamasy júrgizildi. Komissiia quramyna balalar infektsionisi, kardiolog, anesteziolog-reanimatolog, neirohirýrg, pediatr, Nur-Sultan qalasynan gistolog-sarapshylar jáne sanitariialyq-epidemiologiialyq baqylaý komitetiniń mamandary qatysqan.
«Saraptama qorytyndysyna sáikes, balalardyń ólimi ókpe fibrozy, ekijaqty irińdi bronh pnevmoniiasy siiaqty janama aýrýlardyń saldarynan bolǵan. Sondai-aq máiitterdi tekserý barysynda úsh balada dene jaraqaty anyqtaldy. Alaida bul jaraqattardyń tárbielenýshiler ólimine qatysy joq. Osyǵan bailanysty aýyr dene jaraqatyn alý faktisi boiynsha qylmystyq is bólek óndiriske shyǵarylyp, ary qarai tergeý amaldary júrgizilmek», - dedi ShQO PD bastyǵynyń orynbasary Eldos Zakimov.
Onyń aitýynsha, áleýmettik kómek kórsetý ortalyǵynda tárbielenýshilerge tiisti meditsinalyq kómek kórsetpeý faktisi boiynsha qylmystyq is sotqa joldanǵan.
Esterińizge sala ketsek, Aiagózdegi áleýmettik kómek ortalyǵynda 4 bala kóz jumǵan bolatyn.
