Keshe oblys ákimi Danial AHMETOV Aiagóz aýdanynda jumys saparymen bolyp, qaladaǵy birneshe mektepterdiń jai-kúiimen tanysyp, jylý qazandyqtarynyń hal-ahýalyna, keibir mekemeler men áleýmettik oryndardyń tynys-tirshiligine qanyqty.
Shahardyń ońtústigindegi áskeri garnizonnyń aýmaǵyna ornalasqan № 4 aralas jalpy bilim beretin mektepte búgingi kúni 775 oqýshy bilim alyp jatyr. Oblys basshysy mektep ishindegi ashanaǵa bas suǵyp, as mázirimen tanysty. Sondai-aq, mektep ishindegi shaǵyn ortalyqta 118 búldirshin tárbielenýde. Oqý ornynda balalar úsh aýysymda oqidy. Ras, tarshylyq etýde. Alaida, oblys basshysy mektep ishindegi shaǵyn ortalyqtyń sábilerin jeke ǵimaratqa kóshirý máselesin qarastyrý jaǵyn oilastyrýdy usyndy.
- Ras, Aiagózdiń óndirisi men aýyl sharýashylyǵy qatar damyp kele jatyr. Áleýmettik hal-ahýalymyz jaqsarǵan saiyn elimizdiń bolashaǵy - bala sany da arta bermek. Degenmen, biz máseleniń ońtaily jaǵyn qarastyrýymyz qajet. Máselen, shaǵyn ortalyqtyń búldirshinderi úshin osynda qańyrap turǵan keibir ǵimarattardy nege qaita jóndeýden ótkizip, qajetimizge jaratpasqa. Myna garnizon aýmaǵynan bos ǵimarattar tabylmaidy degenge kim senedi? Sondyqtan osyny nazarda ustańyzdar, - dedi oblys ákimi.
Mekteptiń biyl elektrmen jylytýdan góri qatty otynǵa kóshkendigin quptady. Máselen, elektr qazandyǵymen jylytý barysynda shyǵyn mólsheri 10 mln. 220 myń teńge bolsa, qatty otynnyń shyǵyny bar bolǵany 5 mln. 380 myń teńgege túsken. Iaǵni, biýdjet qarjysy únemdelgen.
Oblys basshysy Danial AHMETOV Mamyrsý aýyldyq okrýgindegi Mádeniet úiine at basyn burdy. Shaǵyn qalanyń irgesine ornalasqan eldi mekende keiingi jyldary ájeptáýir sharýalar atqarylǵany baiqalady. Kósheler jainap, eńseli ǵimarattar sap túzegen. Ótken jyly jastarǵa arnalǵan sport kesheni boi kóterse, biyl Mádeniet úiine kúrdeli jóndeý júrgizilgen. Oblys basshysyn án-jyrmen qarsy alǵan aýyl turǵyndary ózderiniń eldi mekende, aýdanda atqarylyp jatqan isterge kóńilderi tolatyndyqtaryn jasyrmai aitty. Aýyl qariiasy Bulanbaev aq batasyn berip, aqjarma alǵysyn aqtardy.
- Aiagóz, Mamyrsý, ózińiz bilesiz, qasietti meken. Biz osy bir kieli óńirde ǵumyr keship kelemiz, - dedi ol. - Osyndaǵy atqarylyp jatqan sharýalarǵa kóńilimiz tolady. Aiagóz -burnaǵy jyldary shańy shyǵyp jatatyn shaǵyn qala edi. Qazir gúldestege oranǵan ásem shaharǵa ainalyp keledi. Sizderge myna jinalǵan jurttyń atynan zor alǵysymdy bildirgim keledi.
Mundai aq tilekterdi aýmaqtyq áleýmettik qyzmet kórsetý ortalyǵynda esepte turǵan múgedek balalar men osynda kelip bos ýaqytyn mándi ótkizip kele jatqan qariialar da arnady. Biyl ǵana úsh qabatty ǵimaratqa qonys aýdarǵan ortalyqqa kelýshiler ózderiniń jaǵdailarynyń jaqsy ekendigin rizashylyqpen jetkizdi. Munda qazir 200 zeinetker men 1-shi jáne 2-shi toptaǵy 108 múmkindigi shekteýli balalarǵa 98 personal qyzmet kórsetedi. Jalpy, bul jerde 102 adam jumys isteidi.
- Ózderińizge málim, biyl elimizdiń táýelsizdik alǵanyna 25 jyl tolyp otyr. Bul óte úlken mereili mereke, - dedi oblys basshysy. - Osydan shirek ǵasyr buryn Qazaqstandy álem tanymasa, qazir bizdiń elimizben dúniejúzi sanasady. Bul - Elbasy Nursultan NAZARBAEVTYŃ sarabdal saiasatynyń jemisi. Osyny barlyq jerde jastarǵa túsindirip aityp júrý - aǵa býynnyń mindeti bolmaq. Mine, mynandai úsh qabatty záýlim de jyly ǵimarat bólip otyrmyz. Barlyq jaǵdailaryńyz jasalǵan. Aǵa býynǵa jaǵdai jasaý - bizderdiń mindetimiz.
Oblys basshysy budan soń № 3 orta mekteptiń biyl ǵana qaita jóndelgen jylý qazandyǵyna bas suǵyp, atqarylǵan iske rizashylyǵyn bildirdi. Qazir atalmysh ǵimarat maýsymyna 600 tonna kómir jaǵady. Oblys ákimi budan soń «SMP-10» merdiger kompaniiasy salyp jatqan quny 396 mln. teńgelik 60 páterli 5 qabatty turǵyn úi qurylysynyń hal-ahýalymen tanysty.
Aiagóz aýdandyq ortalyq aýrýhananyń tynys-tirshiligimen tanysqan Danial AHMETOV osynda em qabyldap jatqan naýqas jandardyń hal-ahýaldaryn surap bildi. Aýrýhana ishi jyly. Naýqas jandardyń barlyǵy da dárigerler men medpersonaldardyń ózderine óte jaqsy qaraityndyqtaryn aityp, alǵys sezimderin bildirdi. Jalpy, 5 qabatty aýrýhana 1978 jyldan halyqqa qyzmet kórsetip keledi. 360 tósektik aýrýhanada barlyǵy 156 adam jumys isteidi. Bas dáriger Shalqar Omarov oblys basshysyna ózderiniń atqaryp jatqan isteriniń jai-kúiin baiandady. 3, 4, 5 qabattarǵa 2011 jyly kúrdeli jóndeý jumystary júrgilgen. Endi 2-shi qabat ishine jóndeý jumystary júrgizilse deidi bas dáriger.
Aiagózde aýyz toltyryp aitarlyq ister barshylyq. Sonyń biri – balabaqsha máselesi tolyǵymen sheshilgen. «Ashah» JShS ashqan «Aiym» atty jekemenshik balabaqshada qazir 180 sábi tárbielenýde.
Aiagózde ónerkásip salasy da jaqsy damyp keledi. Sonyń bir jarqyn kórinisi - biylǵy shilde aiynda qurylysy bastalǵan «Qurylys materialdary kombinaty». Bas jobalaýshy oblys ortalyǵyndaǵy «Shyǵys qurylys joba» JShS. Qurylystyń merdiger kompaniiasy - «SMÝ-Shyǵys» JShS. Oblys basshysy munda atqarylyp jatqan iske únemi qoldaý bildiretindigin aitty. Sol siiaqty, «AVS grýpp» JShS 2014 jyly ashqan «Aiagóz kirpish zaýytynyń» qýaty da orasan. 2018 jyly tolyq qýatynda jumys istegende, jylyna 15 mln. dana kirpish shyǵarýǵa qaýqary bar óndiris orny biyl 240 mln. teńgeniń 6 mln. kirpishin shyǵarady dep josparlanǵan. Al zaýyttyń ónimin Almaty oblysy men kórshiles aýdandardyń qurylys kompaniialary tutynyp keledi.
Oblys basshysy budan keiin «Gordorstroi» JShS-niń «Asfalt zaýyty» men «Plemzavod Qalbataý» JShS salǵan et kombinatynyń tynys-tirshiligimen tanysty. Et kombinatynyń jobalyq qýaty - aýysymyna 15 iri qara, iaǵni, 3 tonna et. Aita keterligi, sol jerde aýdandyq kásipkerlik jáne aýyl sharýashylyǵy bólimi arnaiy kórme uiymdastyrdy. Jergilikti jerde óndirilgen taýarlardan uiymdastyrylǵan kórme shyn mánisinde oblys basshysy men kelgen qonaqtardyń kóńilinen shyqqanyn aita ketken lázim. Aimaq basshysy smetalyq quny 170 mln. teńge bolatyn óndiris ornyn aralap kórdi. Tolyq qýatynda iske qosylǵanda, munda da 15-20 adamǵa jumys orny ashylmaq.
Jastarǵa arnalǵan 50 oryndyq jataqhana úiiniń qurylysy biylǵy maýsymda bastalǵan. «IýKO» JShS júrgizip kele jatqan bul qurylys keler jyldyń maýsymynda aiaqtalmaq. Budan keiin aimaq basshysy «Aiagóz joldary», «DEÝ-71», «Gorjilkomhoz», «Aiagóz sý», «Sý», «PDÝ-4» ujymdarynyń qaz-qatar tizilgen tehnikalarynyń qysqa daiyndyq jaǵdailarymen tanysty.
- Biz Aiagózde 600 oryndyq mekteptiń qurylysyn bastaimyz, - dedi oblys basshysy. - Jalpy, Aiagózde atqarylyp jatqan isterge meniń kóńilim toldy.
Oblys ákimi «Nur Otan» partiiasy Aiagóz aýdaandyq filialynyń ǵimaratynda turǵyndardy qabyldap, olardyń talap-tilekterine qulaq asty, suraqtaryna naqty jaýap qaitardy.
Berikhan Taijigit
Aiagóz aýdany.
