Foto: ©️ Tengrinews.kz / Turar Qazanǵapov
Eńbek jáne halyqty áleýmettik qorǵaý vitse-ministri Nazgúl Saǵyndyqova ziiandy jumystarda isteitin adamdarǵa beriletin arnaiy áleýmettik tólemniń mólsherin jariialady, dep habarlaidy Sputnik Qazaqstan.
Jańa tólem kelesi jyldan bastap tólenedi. Ony ziiandy óndiristerde jumys istep júrgen 37 myń adam ala alady. Negizgi talapqa sáikes, arnaýly áleýmettik tólem alatyn jumysshy 55 jasqa tolýy kerek. Sondai-aq bul tólem ziiandy jumystan ketken jaǵdaida ǵana beriledi. Sosyn keminde 7 jyl mindetti kásiptik zeinetaqy jarnasy tólenýi shart.
"Arnaýly áleýmettik tólem birneshe arnadan tólenedi. Al barlyǵyn qosqanda ortasha eseppen 208 myń teńge shyǵady. Bul aqsha ai saiyn tólenedi jáne bólek-bólek túspeidi. Bir somamen aýdarylady", - dep túsindirdi Saǵyndyqova senatta ótken brifingte.
Arnaiy áleýmettik tólem birneshe jerden tólenedi. Olar:
• biýdjetten - 2 eń tómengi kúnkóris deńgeii mólsherinde arnaýly kásiptik memlekettik járdemaqy;
• jumys berýshiniń qarajaty esebinen - 1 eń tómengi kúnkóris deńgeii mólsherinde kásibi tólem;
• saqtandyrý uiymdarynan - zeinetaqy aldyndaǵy annýitet sharty boiynsha 1 eń tómengi kúnkóris deńgeii mólsherinde saqtandyrý tólemi;
• biryńǵai jinaqtaýshy zeinetaqy qorynan - mindetti kásiptik zeinetaqy jarnalary esebinen qalyptastyrylǵan zeinetaqy tólemi.
Jańa tólem zeinet jasyna deiin tólenip turady.
