Kókshetaýda avtoturaqtaǵy bolǵan jalǵyzbasty ana ólimine qatysty sot otyrysy ótip, kólik júrgizýshisine qatysty sot úkim shyǵardy, dep habarlaidy ult.kz.
Kókshetaý qalalyq sotynda jol júrisi qaǵidalaryn buzý saldarynan adam ólimine ákep soqqan is qaraldy. Qylmystyq is sottalýshy S.-ǵa qatysty Qylmystyq kodekstiń 345-baby 3-bóligi boiynsha qozǵalǵan.
Sot derekterine sáikes, 2026 jyly mamyrda Kókshetaý qalasynda S. kólikti basqarý quqyǵy bolmasa da tizginge otyryp, úidiń aýlasyna burylý kezinde jaiaý júrginshi Sh.-ny qaǵyp ketken. Saldarynan áieldiń densaýlyǵyna aýyr ziian kelip, alǵan jaraqattarynan aýrýhanada qaitys bolǵan.
Aiyptalýshy sotta jubaiynyń densaýlyǵy nasharlaǵandyqtan, onyń ruqsatymen júrgizýshi kýáligi bolmasa da kólik tizginine otyrǵanyn túsindirdi. Al kólik iesiniń avtokólikti júrgizýshi kýáligi joq adamǵa berýi deregi boiynsha qylmystyq is jeke is retinde qaralmaq.
Sotta S.-nyń kinási birneshe dálelmen rastaldy. Atap aitqanda, sottalýshy óz kinásin tolyq moiyndaǵan, sondai-aq kýágerlerdiń jaýaptary, oqiǵa ornyn qarap-tekserý hattamasy, jol-kólik oqiǵasynyń syzbasy, saraptama qorytyndylary men beinejazba is materialdaryna tirkelgen. Jaza taǵaiyndaý kezinde sot birqatar jeńildetetin mán-jaidy eskerdi. Sottalýshynyń jasaǵan isine ókinýi, asyraýynda kámeletke tolmaǵan balalarynyń bolýy, jábirlenýshi tarapqa moraldyq ótemderdi óz erkimen óteýi jáne buryn qylmystyq-ákimshilik jaýapkershilikke tartylmaǵany nazarǵa alyndy.
Sot otyrysynda jábirlenýshi tarap sottalýshy S.-ǵa materialdyq nemese moraldyq talap qoimaitynyn málimdedi. Olardyń aitýynsha, keltirilgen shyǵyn tolyq ótelip, keshirim suralǵan.
"Sot úkimimen S.-ǵa 2 jyl 6 aiǵa bas bostandyǵynan aiyrý jazasy taǵaiyndaldy. QK-niń 74-babynyń 1-bóligi negizinde (zań boiynsha jas balasy bar áielderdiń jazasyn óteýin keiinge qaldyrý mindetteledi), sottalýshynyń tárbiesinde eki jas balasynyń bolýyna bailanysty jazany óteý 3 jylǵa keiinge qaldyryldy", - delingen sot qaýlysynda.
