QR Bas prokýratýranyń tekseristeri kezinde kóptegen zań buzýshylyqtar anyqtaldy. Avtobýsty mas kúiinde júrgizgen adamdardy jumysqa qaita alý faktileri de az emes, dep xabarlaidy QazAqparat tilshisi.
«Avtoparkter jol qozǵalysynyń barlyq talaptaryn buzyp, júrgizýshisi kýáligine aiyrylǵan adamdardy jaldaidy. Máselen, Ońtústik Qazaqstan oblysyndaǵy «Ábdi-Ernur» JShS osydan eki jyl buryn kólikti mas kúide júrgizgeni úshin 3 jylǵa júrgizýshisi quqyǵynan aiyrylǵan B.Qunarovty jumysqa alǵan. Dál osy oblysta «Asyl» JShS E.Eshenqulov degen azamat jumys istep kelgen. Byltyr ol bir jyl merzimge kólik júrgizýden shettetilgen bolatyn», - deidi Bas prokýratýranyń resmi ókili Oksana Loskýtova.
Onymen qosa, kóptegen kásiporyndarda jol qozǵalysy erejelerin júieli túrde buzatyn júrgizýshiler jumys isteidi. Mysaly, Batys Qazaqstan oblysynda «Qazaqstan elim» JShS-de tórt ret, sonyń ishinde mas kúide kólik júrgizgen A.Muxamediev degen azamat jumys isteidi. Odan basqa, atalǵan firmada Qojabergenov, Maxmetov, Túgelbaev jáne Mámbetbaev degen júrgizýshiler bar. Qojabergenov 15 ret, Maxmetov pen Túgelbaev 6 ret, Mámbetbaev 4 ret ákimshilik jaýpkershilikke tartylǵan.
«Ońtústik Qazaqstan oblysynda 9 tasymaldaýshynyń 21 júrgizýshisine 141 ákimshilik is qozǵalǵan, iaǵni árqaisysyna ortasha eseppen 6 zań buzýshylyqtan keledi. Shyǵys Qazaqstan oblysynda Hazirova degen jeke kásipkerdiń júrgizýshileri reiske shyǵardyń aldynda jol paraǵyna meditsinalyq-texnikalyq tekseristen ótkeni týraly mórdi basyp bergeni úshin Aqsýat aýylynyń beket kassirine 200 teńge tólep kelgen. Prokýratýra reiske meditsinalyq tekserissiz 62 ret, texnikalyq tekserýsiz 90 ret shyǵý jaǵdaiyn anyqtady. Joǵaryda atalǵa oblysqa jasalǵan tekserý kezinde Petropavlovka aýlyndaǵy mekteptiń avtobýs júrgizýshisi A.Kýpreev mas kúiinde ustaldy. Avtobýsta 19 adam boldy. Olardyń 15-si - mektep oqýshylary», - dep atap kórsetti O. Loskýtova.
Jalpy, búginde respýblika boiynsha árbir úshinshi avtobýs teznikalyq tekseristen ótpeidi. Texnikalyq tekseris týraly jalǵan kartalar da jii jasalady. Sonyń basym bóligi Ońtústik Qazaqstan oblysyna tiesili.
Aita keteiik, Bas prokýratýranyń tekseristeri nátijesinde 2 361 adam ákimshilik jaýapkershilikke tartyldy. Olarǵa 36 mln-nan astam aiyppul salyndy. 52 tasymaldaýshy ruqsat qaǵazdarynan aiyryldy. 100 laýazymdy tulǵany jaýapkershilikke tartý máselesi qaralýda.
