Kadr: "Almaty" arnasy
Avtobýs júrgizýshisin balǵamen uryp, aýrýhanadan bir-aq shyǵarǵan shymkenttik jas jigit bas bostandyǵynan aiyrylmaidy, dep habarlaidy Ult.kz Almaty.tv-ǵa silteme jasap.
Sebebi 17 jastaǵy turǵyn óz kinásin moiyndap, jábirlenýshi tarappen tatýlasqan. Sot ony bostandyqqa jiberdi.
Eske salsaq, oqiǵa maýsymda bolǵan. Sol kezde № 52 baǵyttaǵy qoǵamdyq kólik júrgizýshisi bir adamnyń jol aqysyn tólemegenin aityp, eskertý jasaǵan. Alaida azamat bul sózge ashýlanyp, avtobýs júrgizýshisin balaǵattap, syrtqa shyǵýyn talap etken. Arty tóbeleske ulasyp, júrgizýshige birneshe adam jabyla ketken. Keleńsiz jaittan keiin kámeletke tolmaǵan jigit qamaýǵa alynǵan.
"Qylmystyq kodekstiń 114-baby 3-bóligi boiynsha aiyptalǵan aiyptalýshyǵa qylmystyq kodekstiń 68-baby 1-bóligi qoldanylyp, ol jábirlenýshimen tatýlasyp, keltirilgen ziiandy qalpyna keltirgenine bailanysty qylmystyq jaýapkershilikten bosatylyp, qylmystyq is toqtatylsyn. Aiyptalýshyǵa qoldanylǵan bultartpaý sharasy ózgertilip, dereý bosatylsyn", – dedi sýdia Bolat Qarabaev.
