Aqtóbe oblysyndaǵy 52 ózbek azamaty mert bolǵan avtobýsta órttiń naqty neden shyqqany búgin belgili bolady. Al avtobýs apatynan aman qalǵan bes adam oqiǵanyń qalai bolǵanyn aityp berdi, - dep habarlaidy Tengrinews.kz tilshisi. Bul týraly 18 qańtarda Aqtóbede ótken brifing barysynda Qazaqstannyń ishki ister ministriniń orynbasary Erlan Turǵymbaev málimdedi.
"Máiitterdi kózben taný múmkin emes. Sondyqtan olar Aqtóbe máiithanasyna jetkizilip, sol jerde anyqtalady. Salon avtobýsy da tolyq órtenip ketken. Sol sebepti sot meditsinasy men ózge de mamandardy osy iske tarttyq. Órt-tehnikalyq zerthana jumys istep jatyr. Jumystyń kóptigine bailanysty kúndizgi ýaqytta úlgermedi, túnde jalǵasady. Erteń tańǵysyn nemese túske deiin órtený sebebi anyqtalady degen úmittemiz", - dedi ol keshe, 18 qańtarda ótken brifingte.
Sonymen qatar, Turǵymbaev bolǵan oqiǵany qaiǵyly jaǵdai dep atady jáne adamdar nege syrtqa shyǵa almaǵanyn aityp berdi.
"Jol-kólik oqiǵasy bolmaǵanyn erekshe atap ótkim keledi. Avtobýs jol shetinde tehnikalyq jaǵdaiy durys kúide turǵan. Eshqandai qylmystyq jaǵdai anyqtamadyq. Iaǵni, qaiǵyly jaǵdai. Tiri qalǵan bes adamnyń aldyn ala kórsetpesi boiynsha, órt salonnan shyqqan. Aldymen ashy tútin taraǵandyqtan kópshilik ýlanyp qalǵan, barlyǵy nege aman qalmaǵanynyń birinshi sebebi osy. Ekinshi - esik ashylǵanda salonǵa ottegi kirip, órt lap ete qalǵan. Avtobýs eki deńgeili bolǵan, joǵaryda adamdar, al birinshi deńgeide júkter jatqan. Júk tolyq órtenip ketken, iaǵni, jalyn qatty bolǵan", - deidi ministrdiń orynbasary.
Eske salaiyq, osyǵan deiin Aqtóbede avtobýs órtenip, 52 adamnyń qaza tapqany jaily habarlanǵan bolatyn. Ikarus markaly avtobýstyń 18 qańtarda saǵat 10:30-da Aqtóbe oblysy Yrǵyz aýdanynda Samara - Shymkent tasjolynyń 1068 shaqyrymynda, Qalybai aýylynan 10 shaqyrym jerde órtengeni aitylǵan edi. Avtobýstyń ishinde 55 jolaýshy jáne eki júrgizýshi bolǵan. Onyń beseýi avtobýstan shyǵyp úlgergen. Keiin oqiǵa ornynan túsirilgen video men fotosýretter jariialandy.
