Avstraliianyń shyǵys jaǵalaýyndaǵy nóser jaýyn kei aýdandarda keiingi jarty ǵasyrdaǵy eń iri sý tasqynyna ákeldi. Bul týraly jeksenbi, 21 naýryz kúni jergilikti bilik habarlady.
Jańa Ońtústik Ýels shtatynyń premer-ministri Gledis Beredjiklian jaǵdai boljamdaǵydan aýyrlaý bolǵanyn málimdedi. Segiz million halqy bar Jańa Ońtústik Ýels – Avstraliianyń halqy eń tyǵyz ornalasqan shtaty.
"Keshe biz mundai oqiǵa 20 jylda bir bolar dep úmittengenbiz. Qazir ol 50 jylda bir bolatyn jaǵdaiǵa uqsap tur" dedi Beredjiklian teledidardan kórsetilgen brifingte.
Sidneidiń soltústik-batys bóligindegi kei aýdandarda turǵyndarǵa tún ortasynda úiin tastap ketýdi usyndy. Óitkeni aǵysy jyldam sý jappai búlinýge ákeldi. Beredjikliannyń sózinshe, myńǵa jýyq adam kóshýge kómektesýdi suraǵan, tórt myńǵa jýyq adam úiin tastaýǵa májbúr bolýy múmkin.
Telereportajdar men áleýmettik jelide taraǵan videolardan sý tasqynynyń úiler men joldardy qalai qiratyp jatqanyn kórýge bolady. Aǵashtar qulap, jol infraqurylymyna zaqym kelip jatyr. Apat qyzmetteri júzdegen úidiń búlingenin habarlady.
Shtattaǵy birneshe iri joldar jabylyp, kóptegen mektep dúisenbidegi sabaqtardy keiinge qaldyrdy.
Meteorologtardyń habarlaýynsha, nóser birneshe kún boiy jaýmaq. Apat brigadalary beisenbi, 18 naýryzdan beri kómek qolyn suraǵan 6000 qońyraý túskenin aitady.
Baspasózdiń habarlaýynsha, tabiǵi apat Jańa Ońtústik Ýels shtatyndaǵy vaktsinalaý protsesine de teris yqpal etip, 6 million dozanyń jetkizilýin birneshe aptaǵa shegergen.
