Avstraliia biligi Viktoriia shtaty men Qytai arasynda "Bir beldeý – bir jol" jobasy aiasynda jasalǵan eki kelisimdi buzdy. Batysta Pekinniń bul jobasyn "Qytaidyń jumsaq kúshi" retinde qarastyrady. Bul týraly Reuters agenttigi habarlady.
Kelisimderdi buzý týraly sheshimdi Avstraliia syrtqy ister ministri Mariz Pein qabyldaǵan. Onyń sózine qaraǵanda, Qytaimen jasalǵan osyndai tórt kelisim buzylady. Ministrdiń aitýynsha, qujattardyń barlyǵy "Avstraliianyń syrtqy saiasat boiynsha múddesine qaishy".
Agenttiktiń jazýynsha, Kanberra men Pekin arasynda diplomatiialyq qaishylyqtar tereńdegen shaqta osyndai sheshim qabyldanyp otyr. Buǵan deiin Pekin Avstraliiadan keletin taýarlarǵa sanktsiia salǵan.
"Bir beldeý – bir jol" – Si Tszinpin úkimetiniń syrtqy saiasatta júzege asyryp jatqan basty jobasy. Joba Shyǵys jartyshardy kóktep ótetin úsh qurǵaq jáne eki teńiz dálizin ashýdy kózdeidi. Qytai jobany oǵan qatysqan keibir elderdi áýeli ekonomikalyq, keiinirek saiasi turǵyda baǵyndyrý úshin paidalanady degen qaýip bar.
Batys elderi Qytaimen qarym-qatynasyn qaita qarastyryp jatqan shaqta Avstraliia shtaty Qytaimen kelisimderden bas tartyp otyr. Jaqynda AQSh prezidenti Djo Baiden bul ǵasyr demokratiia men avtokratiia kúresiniń ǵasyry bolmaq dep málimdegen. Ol avtokrat elderdiń qataryna birinshi kezekte Qytai men Reseidi jatqyzǵan.
Degenmen Germaniia syrtqy ister ministri Haiko Maas 21 sáýirde aradaǵy iri qaishylyqtarǵa qaramastan Eýroodaq Qytaimen qarym-qatynas ornatýy tiis dep málimdegen. Onyń aitýynsha, Eýroodaq Pekindi birmezgilde "áriptes, básekeles ári júieli qarsylas" retinde qarastyrady. "Osy úsh ólshem turǵysynan alǵanda bizge Pekinmen turaqty, berik qarym-qatynas ornatý kerek. Aiyrylysý – durys emes" dedi qytailyq áriptesimen kezdesýge daiyndalyp jatqan ministr.
