Azamattyq aviatsiia akademiiasynyń rektory Beken Seidahmetovtyń aitýynsha, Bilim jáne ǵylym ministrliginiń normativti qujattary halyqaralyq aviatsiialyq talaptarǵa sai kelmeidi, dep habarlaidy QazAqparat.
«Biz azamattyq aviatsiiany damytýdyń 2025 jylǵa deiingi tujyrymdamasyn ázirledik. Qazaqstannyń ózin Shyǵys pen Eýropany bailanystyratyn halyqaralyq fab retinde tanystyratyny belgili. Sondai-aq, Tuńǵysh Prezidenttiń burynǵy Joldaýlarynda da aviatsiia salasynda bilikti mamandardyń kerektigi týraly aitylǵan bolatyn. «Boing» kompaniiasynyń aldaǵy 30 jylǵa jasalǵan boljamdy zertteýleri jalpy álemdik aviatsiiaǵa 679 myń injenerlik tehnikalyq mamannyń, 617 myń pilottyń kerek ekenin kórsetken. Aldyn ala boljamǵa súiensek, Qazaqstannyń aviatsiia salasyna aldaǵy 20 jylda 1200 pilot pen 1500 injener kerek», - dedi Beken Seidahmetov elordada ótken baspasóz máslihatynda.
Onyń aitýynsha, áýe tasymaly naryǵynyń keńeiýine bailanysty áýe kompaniialary arasynda báseke burynǵydan qyza túsken. Áýe jolaýshylarynyń sany da óse bermek.
«Búgingi kúni saladaǵy ahýal týraly baian eteiin. Biz otandyq nusqaýshylar men basqarýshylardyń, aviamamandardyń jetispeýshiligin sezip otyrmyz. Aviatsiia salasynda elimizde 20 myń maman bar desek, onyń 650-i - sheteldik. Akademiianyń oqý baǵdarlamasynyń halyqaralyq aviatsiialyq talaptarǵa sai emestigin basa aityp ótkimiz keledi. Aviamamandardy daiarlaýǵa qarajat durys josparlanbaǵan. Ulttyq kvalifikatsiia júiesiniń álsiz ishki tártibi, daiarlaý júieleriniń arasynda bailanystyń bolmaýy baiqalady. Bizde 30 kásibi standart bolýy tiis. Qazirgi ýaqytta oqý baǵdarlamasy kásibi standarttardyń negizinde jasalady», - dedi ol.
Beken Seidahmetov qazir akademiia túlekterine esh jerde suranys joq ekenin aitady.
«Abitýrientterdi tańdaý boiynsha túlekterdi jumysqa turǵyzý mehanizmi joq. Bir pilotty daiyndaýǵa ketip jatqan shyǵyn oqý grantynyń qunynan 10 ese asyp ketedi. Iaǵni, bir pilotty daiyndaý úshin memleket 20 million teńge jumsaidy. BǴM-niń normativti qujattary halyqaralyq aviatsiia talaptaryna sai kelmeidi. Oqytýshylyq quram álsiz, halyqaralyq sertifikaty bar nusqaýshylar jetkiliksiz», - dedi ol.
Beken Seidahmetovtyń sózine sensek, 2019 jyly akademiiadan 702 túlek túlep ushqan. Sonymen birge, aviatsiia kolledjin 295 túlek bitirse, 407-i akademiiada oqý bitirip, 19-y - magistrant. Biyl akademiia 797 stýdentti oqýǵa qabyldaǵan. Onyń ishinde 269-y aviatsiialyq kolledjge qabyldansa, 492-i akademiiaǵa oqýǵa kelgen. Onyń 107-i – ushqyshtar. Bir adam doktorantýraǵa, 35-i magistratýraǵa túsken.
