Qazaqstannyń 2019 jyldaǵy sý, energiia, klimat ózgerisi boiynsha turaqty damý kórsetkishteriniń nátijesi jariialandy, dep habarlaidy "Ult aqparat".
Bul týraly BUU úiinde Turaqty damý maqsattaryn qarjylandyrý máseleleri boiynsha birinshi aimaqtyq sammitte aityldy.
Qazaqstan Búkilálemdik banktiń baǵalaýy boiynsha jahandyq klimattyq ózgeristerge beiim elder qataryna jatqyzyldy.
Zertteý jumystaryna sáikes, Qazaqstan 20 mlrd tekshe metr sý jumsaityny anyqtaldy. Onyń 14 mlrd tekshe metri (68%) aýylsharýashylyǵy ónimderin sýarýǵa baǵyttalady. 2 mlrd tekshe metri óndiriske jumsalady. 1 mlrd tekshe metr sý kommýnaldyq maqsatqa paidalanylady.
Sý resýrstarynyń azaiýyna bailanysty 2030 jylǵa taman sý tapshylyǵy - 14 mlrd tekshe metrge (70 %), 2050 jyly 20 mlrd tekshe metrge jetedi. Oǵan klimattyq ózgeristerge bailanysty sý resýrstarynyń azaiýyn taǵy qosýǵa bolady. Eger, tutynýdyń osy shemasy ózgermese, aýyzsý máselesi – ulttyq qaýipsizdik deńgeiine deiin teńestiriledi.
Eger stsenarii osy qalyptan ózgermese 2030 jylǵa taman jylyna 7-8 mlrd dollar shyǵyn keledi.
BUU bastamasymen qurylǵan Turaqty damý maqsattarynda osy baǵytta birneshe mindet mejelengen.
Qujatta kórsetilgen 12 maqsat, 169 mindet, 300 usaq indikatordy kez-kelgen memleket jaýapkershilikpen oryndaýy tiis.
Turaqty damý maqsattary halyqaralyq deńgeide bekitilgen kontseptsiialarda jariialanǵan. Bul tujyrymdamalar jer betindegi ortaq ekologiialyq, áleýmettik-ekonomikalyq problemalardy sheshýge baǵyttalǵan. Eki kúnge sozylatyn sammit osy máseleniń sheshý joldaryn qarastyrmaq.
Qazaqstannyń jekelegen damý kórsetkishteriniń taldaýyna súiensek, ótken jyldarmen salystyrǵanda kóp kórsetkishte ilgerileý bar. Máselen kedeilik kórsetkishi 1996 jyly 34,6% bolsa, 2018 jyly 4,7% bolǵan. Adamnyń damý indeksinde Qazaqstan álemniń 189 memleketiniń ishinde 58-orynda tur. 2019 jyly Qazaqstan «Doing Business» reitingisiniń biznesti júrgizý jeńildigi kórsetkishi boiynsha 190 eldiń ishinen 25-orynǵa taban tiredi.
