Aýyr atletikadan olimpiadalyq daiarlaý ortalyǵynyń basshysy para aldy dep aiyptalýda, dep habarlaidy «Ult aqparat» Sybailas jemqorlyqqa qarsy is-qimyl agenttigine silteme jasap.
Almaty qalasynyń sybailas jemqorlyqqa qarsy qyzmeti Aýyr atletikadan olimpiadalyq daiarlaý ortalyǵynyń basshysy men osy kásiporynnyń bas esepshisine qatysty para aldy degen kúdikpen sotqa deiingi tergeýdi bastady.
«Olar aldyn ala sóz bailasyp, Jambyl oblysynda oqý-jattyǵý jiynyn ótkizý boiynsha Memlekettik satyp alý týraly jasalǵan kelisimshartqa syiaqy retinde kásipkerden 6 mln 625 myń teńge kóleminde para aldy degen kúdikke ilindi» delingen habarlamada.
17 jeltoqsanda atalǵan tulǵalar ustalyp, qamaldy. Bultartpaý sharasyn tańdaý máselesi sheshilýde. Sotqa deiingi tergeý jalǵasýda.
Kúdiktilerge qatysty túpkilikti sheshimdi sot shyǵarady.
