Aýyr atletikadan Qazaqstan quramasyna dopingtik erejebuzýshylyqtaryna bailanysty Anahaimada ótetin 2017 jylǵy álem chempionatyna qatysýǵa tyiym salyndy. Bul týraly insidethegames.biz portaly habarlady.
Derekkózdiń málimetinshe, Qazaqstan Olimpiada oiyndarynda kóptegen doping erejebuzýshylyqtaryna bailanysty álem chempionatyna qatysý múmkindiginen aiyrylǵan toǵyz komandanyń qatarynda. Qalǵan segiz el: Resei, Qytai, Belarýs, Ázirbaijan, Armeniia, Túrkiia, Ýkraina jáne Moldaviia.
Osy atalǵan quramalarda Beijińdegi jáne Londondaǵy Olimpiada oiyndarynda doping-synamalaryn qaita tekserý nátijesinde kemi úsh atlettiń aǵzasynda tyiym salynǵan preparattar tabylǵan. Resei quramasynda 10 atlettiń dopingpen ustalǵany aitylady.
Halyqaralyq aýyr atletika federatsiiasynyń (IWF) atqarý komitetine osy atalǵan quramalarǵa qatysty qandai shara qoldaný kerektigi jaiynda usynys túsiretin úsh adamnan turatyn komissiia Býdapeshte kezdesip, qorytyndy shyǵarady. Olardyń esebi IWF atqarý komitetiniń 30 qyrkúiek pen 1 qazanda Býhareste ótetin kezekten tys otyrysynda usynylady.
Toǵyz quramaǵa qatysty bir jylǵa deiingi shettetý sharasy engiziletini aitylady, alaida barlyq elge álem chempionatynan keiin diskvalifikatsiianyń merzimin azaitýǵa múmkindik beriledi.
