Aýyr atletikadan jasóspirimder arasyndaǵy álem chempiony qyzylordalyq Rahat Bekbolat endi eresekter arasynda synǵa túsedi, dep habarlaidy QazAqparat.
Oblys ákimi Gúlshara Ábdiqalyqova jasóspirimder arasynda álem chempiony atanǵan aýyr atlet Rahat Bekbolatpen kezdesti.
Júzdesýge oblys ákiminiń orynbasary Serik Ahmet, oblystyq aýyr atletika federatsiiasynyń prezidenti Temirhan Kenjebaev, QR eńbegi sińgen jattyqtyrýshy Nurjan Smahanov jáne aýyr atletikadan 4 dúrkin álem chempiony Ilia Ilin qatysty.
Qyzylordalyq 17 jastaǵy ziltemirshi 11 qazan kúni Saýd Arabiiasynyń Djiddada qalasynda ótken álem chempionatynda 102 kelige deiingi salmaqta altynnan alqa taqty.
Ol qossaiystyń qorytyndysymen 355 keli salmaqty eńserdi.
Osylaisha Rahat jasóspirimder arasynda ekinshi márte álem chempiony atandy.
Kezdesýde aimaq basshysy álemdik arenada el abyroiyn asqaqtatyp, oljaly oralǵan sportshyny jeńisimen quttyqtap, igi tilegin arnady.
«Árbir jeńis eńbeksiz kelmeidi. Elimizde qoldaýdyń nátijesinde sportshylar úzdiksiz jalyqpai jattyǵýǵa múmkindik aldy. Árbir jas jarysqa jaýaptylyqpen qaraidy. Olarǵa bilikti bapkerler keńesin berip júr. Osynyń arqasynda osyndai zor jetistikterge qol jetkizip otyrmyz. Boksshy Qamshybek Qońqabaev biyl Olimpiadada júldeli oraldy. Endigi kezekte seniń bul jeńisiń - el egemendiginiń 30 jyldyq mereili belesindegi tolaǵai tabystyń biri», - dedi Gúlshara Ábdiqalyqova.
Júzdesý barysynda Rahat Bekbolat jarys kezindegi erekshe sátterimen bólisti.
Qoldaý kórsetken jankúierlerine alǵysyn bildirip, el mártebesin odan ári asyrýǵa daiyn ekendigin jetkizdi.
Oblys ákimi Rahat Bekbolatqa jerlesteri atynan syi-siiapat retinde demeýshiler esebinen 1 million teńgeniń sertifikatyn tabystady.
Aita keteiik, Rahat Bekbolat ótken jyly Perýdiń Lima qalasynda onlain formatta ótken Álem kýbogynda jeńimpaz atanyp, el mártebesin asyrdy. Júzdesý barysynda qyzylordalyq sportshy endi eresekter arasynda baq synaityn aityp ótti.
Aldaǵy jeltoqsan aiynda Ózbekstan astanasy Tashkent qalasynda álem chempionaty jalaýyn kóteredi. Oǵan qazaqstandyq aýyr atletter Almaty qalasynda daiyndyq júrgizedi.
