Memleket basshysynyń «Bolashaqqa baǵdar: rýhani jańǵyrý» baǵdarlamasyn júzege asyrýǵa baǵyttalǵan «Aýylym – altyn besigim» atty aýyldyq mádeniet úileri men klýbtary arasynda ótken oblystyq konkýrstyń júldegerleri keshendi dybys apparatýralary men árqaisysy 300 myń teńgeden aqshalai syilyqqa ie boldy. Marapattaý saltanaty Taldyqorǵan qalasyndaǵy I. Jansúgirov atyndaǵy Mádeniet saraiynda ótti. Jeńimpazdardy oblys ákimi Amandyq Batalov quttyqtady.
Konkýrs qatysýshylaryn quttyqtaǵan oblys ákimi A. Batalov:
- Halqymyzdyń mádeni ál-aýqatyn arttyrmai, tolyqqandy el bolý qiyn. Barlyq ónerdiń bastaýyna ainalǵan aýyl mádenietiniń bolashaǵy – qazaq eliniń rýhani kemeldenýi. Sol sebepti aýyl jurtshylyǵyna degen kómegimizdi aiamai, qoldaý tanytý – bizdiń basty mindetimiz. Jyl saiyn ótetin Mádeniet kúnderin ótkizý formaty biyl ózgertilip, aýyldyq mádeniet úileri men klýbtary qamtyldy. Bul baiqaýǵa aýyldardaǵy 33 mádeniet nysany qatysty, olardyń barlyǵyna da syilyqtar beriledi. Ár aýylda, árbir eldi mekende úlkender úshin de, jastar úshin de klýbtardyń, mádeniet úileriniń bolǵany mańyzdy. Sol maqsatta jumys júrgizip kelemiz. Oblystaǵy mádeniet nysandarynyń kúrdeli jóndeý jumystary men jobalyq-smetalyq qujattaryn ázirleýdiń ózine ǵana 1,1 mlrd. teńge bólindi. Aldaǵy ýaqytta da birlesip atqarǵan isterimiz jemisti bolsyn! Mádenietimizdi, baǵa jetpes ónerimizdi nasihattaý jolyndaǵy eńbegimiz eselene bersin, - dedi óz sózinde.
Baiqaý qorytyndysy boiynsha 8 aýyldyq mádeniet úii jeńimpaz dep tanylyp, árqaisysyna 300 myń teńgeden aqshalai syilyq sertifikaty men keshendi dybys apparatýralary berildi.
Saltanatty rásim barysynda qatysýshylardyń barlyǵy da marapattalyp, syilyqtarǵa ie boldy. Máselen, 10 aýyldyq mádeniet úii men klýbtarǵa dybys apparatýrasy syiǵa tartylsa, qalǵan 15-ine barlyq qosalqy qural-jabdyqtarymen birge kompiýterler tartý etildi. Sóitip, konkýrstyń barlyq qatysýshylaryna mádeniet nysandarynyń jumysyn jaqsartýǵa, materialdyq-tehnikalyq bazasyn nyǵaitýǵa baǵyttalǵan syilyqtar berildi.
Shara barysynda konkýrsqa qatysýshylardyń úzdik nómirlerinen daiyndalǵan gala-kontsert usynylady.
Atap ótsek, Almaty oblysynda 563 mádeniet nysany men arhiv bar. Biylǵy jyly mádeniet salasynyń biýdjeti 8,3 mlrd. teńgeni qurady. Qazirgi kezde Sarqan aýdandyq mádeniet úii, Jambyl aýdany Myńbaev aýylyndaǵy, Sarqan aýdany Baqaly aýylyndaǵy aýyldyq mádeniet úileri, Taldyqorǵan qalasyndaǵy memlekettik arhiv ǵimaratyna kúrdeli jóndeý júrgizilip, sol siiaqty 5 mádeniet nysanynyń jóndeý jumystarynyń jobalyq-smetalyq qujattary daiyndalýda.
