Frantsiiada birneshe kúnnen beri jalǵasyp jatqan aptap ystyq saldarynan keminde 18 adam qaza tapty, dep habarlaidy ult.kz.
Qurbandardyń qatarynda úsh qart adam men eki jáne tórt jastaǵy eki búldirshin bar. Al taǵy 13 adam jeksenbiden beri ózen-kólderge shomylý kezinde sýǵa ketip, mert bolǵan.
Sońǵy málimet boiynsha, eldiń batysyndaǵy Bordo qalasynda aýa temperatýrasy 41,9–42 gradýsqa deiin kóterip, maýsym aiy úshin tarihi rekord jańardy. Sondai-aq Pýate qalasynda da 1947 jyldan bergi eń joǵary temperatýra tirkeldi.
Frantsiianyń ulttyq meteorologiialyq qyzmeti Météo-France eldiń ondaǵan departamentinde qyzyl jáne qyzǵylt sary deńgeidegi qaýip jariialap, turǵyndardy kúnniń eń ystyq ýaqytynda syrtqa shyqpaýǵa, kóp sý ishýge jáne egde jastaǵy adamdar men balalarǵa erekshe kóńil bólýge shaqyrdy.
Aptap ystyqqa bailanysty myńdaǵan mekteptiń jumysyna ózgeris engizilip, keibiri ýaqytsha jabyldy. Bilik azamattardy salqyndatý úshin qaraýsyz ózen-kólderge túspeýge shaqyryp otyr, óitkeni sońǵy kúnderi sýǵa ketý oqiǵalary kúrt kóbeigen.
Mamandar qazirgi ystyq tolqynyn 2003 jylǵy Eýropada myńdaǵan adamnyń ómirin qiǵan aptappen salystyryp, klimattyń ózgerýi mundai ekstremaldy qubylystardyń jiilep, kúsheiýine áser etip jatqanyn aitady.
