QR Parlamenti Senatynyń tóraǵasy Máýlen Áshimbaev «Aýyl – El besigi» jobasyna ulttyq joba mártebesin berýge qatysty pikir bildirdi, dep habarlaidy QazAqparat.
«Eń aldymen, aýyldyq aýmaqtardy mmelekettik basqarýdyń tiimdi tetigin qalyptastyrý qajet ekeni anyq. Búgin «Aýyl – El besigi» jobasyna ulttyq joba mártebesin berý týraly jaqsy usynys aityldy. Bul bastamany oryndy dep qabyldaimyz. Ulttyq joba osy baǵyttaǵy máselelerdi keshendi túrde sheshýge, aýylǵa kórsetiletin memlekettik qoldaýdy júieleýge múmkindik beredi. Osy rette Memleket basshysynyń tapsyrmasyn esten shyǵarmaiyq», - dedi M. Áshimbaev Senattaǵy aýyldyq aýmaqtardy damytý jónindegi parlamenttik tyńdaýda.
Sonymen qatar ol búgin aýyldyq aýmaqtardy damytý máselelerin Aýyl sharýashylyǵy ministrligine berý týraly sóz bolǵanyn eske saldy. Bul osy salaǵa bólingen resýrstardy bir úilestirýshi organǵa shoǵyrlandyrýǵa múmkindik beredi jáne senatorlar osy usynysty qoldap otyr.
«Aýyl halqynyń ómir súrý deńgeiin arttyrýdyń negizgi faktory – sapaly infraqurylym qalyptastyrý ekeni túsinikti. Ol degenimiz – densaýlyq saqtaý, bilim berý, mádeniet, baspana máselelerin ońtaily sheshý degen sóz. Sondai-aq, sapaly jol men tsifrlyq infraqurylymdy damytý. Sondyqtan aýyldy damytýdy qarjylandyrý Respýblikalyq biýdjettiń basym baǵyttarynyń biri bolýy kerek dep esepteimiz», - dep atap ótti Senat tóraǵasy.
Máýlen Áshimbaev aýyl turǵyndaryn jumyspen qamtý jáne olardyń tabysyn arttyrý da eń ózekti máselelerdiń biri ekenin aitty. Osy maqsatta eń aldymen, jumys oryndaryn ashý, aýyldyq kásipkerlikti damytý jáne qosymsha memlekettik qoldaý sharalaryn júzege asyrý qajet ekeni atalyp ótti.
