Senat depýtaty Aqylbek Kúrishbaev halyqtyń aýyldyq jerden qalaǵa kóshýi ósip kele jatqanyna alańdaýshylyq bildirdi, dep habarlaidy "Ult aqparat".
«Aýyldyq jerlerdiń búgingi ahýaly qandai? Onda turatyn halyqtyń turmys-tirshilik, áleýmettik jaǵdaiy qandai deńgeide? 2011 jyly bizde aýyl halqynyń úlesi 45,4 paiyzdy qurasa, qazir bul kórsetkish 41,3 paiyzǵa teń. Ásirese, onyń ekonomikalyq belsendi bóligi úlesiniń kúrt tómendeýi alańdatady. Máselen, sońǵy 10 jylda eńbekke qabiletti jastaǵy adamdar sany 4,1-den 3,8 mln adamǵa deiin tómendegen», - dedi depýtat Senattaǵy aýyldyq aýmaqtardy damytý jónindegi parlamenttik tyńdaýda.
Osy oraida ol jyldan jylǵa halyqtyń aýyldyq jerden kóshýi ósip kele jatqanyn jetkizdi. Ótken jyly jarty millionǵa jýyq adam aýyldan qalalarǵa qonys aýdarǵan.
«Buryn aýylda bala týý deńgeii qalaǵa qaraǵanda árqashanda joǵary bolatyn. Al sońǵy alty jylda bul kórsetkish aýyldyq jerlerde tómendep ketti. Statistika málimetteri boiynsha, 2019 jyly aýyldaǵy jan basyna shaqqandaǵy tabys aiyna 45 829 teńgeni quraǵan (qalada – 66 207 teńge). Al biz júrgizgen saýalnama nátijeleri boiynsha aýyl turǵyndarynyń tabystaryn baǵalaý odan da az, aiyna – 35 349 teńge. Aita ketý kerek, biryńǵai jiyntyq tólemdi tóleýshi 3,6 mln adamnyń 2 mln nemese 56,2 paiyzy aýyldarda turady. Sondai-aq, tabysy, kúnkóris deńgeiinen tómen, az qamtylǵan otbasylar sany aýyldyq jerlerde 6,6 paiyz, bul qalaǵa qaraǵanda 2,5 ese kóp. Osylaisha, elimizdiń kedei jáne kúnkórisi tómen otbasylardyń negizgi bóligi aýyldyq eldi mekenderde turady», - dedi A. Kúrishbaev.
Onyń sózine qaraǵanda, aldaǵy ýaqytta aýylda 150 jańa densaýlyq saqtaý nysandaryn ashý qajet. Aýyldyq jerlerde dárigerlerge qajettilik 900-den astam adamdy quraidy. Bul rette qalada 10 myń adamǵa 56 dárigerden kelse, aýylda tek qana 16 dáriger nemese 3,5 ese az.
