Parlament Senaty memlekettik qyzmet salasyndaǵy zań jobasyna engiziletin túzetýlerdi qabyldady, dep habarlaidy "Ult aqparat".
Búgin Qazaqstan Respýblikasy Senatynyń plenarlyq otyrysynda Memlekettik qyzmet isteri agenttigi ázirlegen «Qazaqstan Respýblikasynyń keibir zańnamalyq aktilerine memlekettik qyzmet máseleleri boiynsha ózgerister men tolyqtyrýlar engizý týraly» Zań jobasy maquldandy.
Atalǵan Zań jobasyn Senat depýttaryna QR Memlekettik qyzmet isteri agenttiginiń tóraǵasy A.Jaiylǵanova tanystyrdy.
Anar Jaiylǵanovanyń aitýynsha Zań jobasy Elbasynyń jáne Prezidenttiń memlekettik qyzmet salasyn jetildirý boiynsha berilgen tapsyrmalaryn oryndaý maqsatynda ázirlengen.
«Zań jobasynda « Diplommen aýylǵa» jobasyn memlekettik qyzmetshilerge qoldaný, «A» korpýsynyń kadr rezervin jasaqtaýdan bas tartý, arnaiy tekserý júrgizý kezeńin memlekettik qyzmet ótiline qosý, memlekettik qyzmetke ornalasý boiynsha konkýrstyq rásimderdi ońtailandyrý, jekelegen saiasi laýazymdarǵa Prezidenttiń sheshimi boiynsha biliktilik talaptaryn belgileý siiaqty túzetýler qarastyrylǵan», – dedi Anar Jaiylǵanova.
Sondai-aq, vedomstvo basshysy zań jobasyn qabyldaý teris áleýmettik-ekonomikalyq jáne quqyqtyq saldarǵa, sondai-aq memlekettik biýdjetten shyǵyndarǵa ákep soqpaitynyn aitty.
Budan bólek, Zań jobasynda qarastyrylǵan normalardyń biri Sybailas jemqorlyq quqyq buzýshylyq nemese memlekettik qyzmetke kir keltiretin tártiptik teris qylyq jasaǵany úshin jaýapkershilik qaralatyn adamdardy basqa memlekettik qyzmetke aýysýyna bailanysty jumystan bosatýǵa tyiym salý.
Qoldanystaǵy zańdaǵy osyndai shekteýler óz erki boiynsha jumystan bosatý úshin kózdelgen jáne quqyq buzýshylyq jasaǵan adamdardy jaýapkershilikten bosatýdyń jolyn kesýge baǵyttalǵan.
Memlekettik qyzmetke ornalasý boiynsha konkýrstyq rásimder ońtailandyrylatyn bolady. Atap aitqanda, 3 kezeńdik konkýrstyq irikteýden 2 kezeńdik konkýrstyq irikteýge kóshý. Iaǵni barlyq memlekettik organdardyń memlekettik qyzmetshileri arasyndaǵy 2-shi ishki konkýrsty jáne jalpy konkýrsty biriktirý usynylady.
Bul konkýrstyq rásimderdiń ýaqytyn qysqartýǵa jáne bos jumys oryndaryn toltyrýdyń jedeldigin arttyrýǵa múmkindik beredi.
Memlekettik qyzmetshilerge «Diplommen aýylǵa» jobasynyń qoldanylýy bilikti kadrlardy tartý úshin aýyldaǵy memlekettik qyzmettiń tartymdylyǵyn arttyrýǵa múmkindik beredi.
Agenttiktiń málimetinshe, aýyldarda kadr tapshylyǵy myńnan astam adamdy quraidy. Bul jas memlekettik qyzmetshilerge turǵyn úi satyp alý nemese salý úshin beriletin kóterme járdemaqy men biýdjettik kreditter alýǵa múmkindik beredi.
Jalpy, Zań jobasy aiasynda 1 kodekske jáne 5 zańǵa túzetý engizý qarastyrylǵan.
