QR Densaýlyq saqtaý vitse-ministri Liazzat Aqtaevanyń aitýynsha, elimizde meditsina mamandarynyń kásibi daiyndyǵy kóńil kónshitpeidi. Ásirese, aýyldy jerlerde meditsinalyq qyzmettiń sapasy tómen, dep habarlaidy QazAqparat tilshisi.
«Osyǵan bailanysty búginde sheteldiń joǵary oqý oryndarymen birlese otyryp, elimizdiń meditsinalyq bilimin jańǵyrtý sharalary qolǵa alynyp jatyr. Meditsinalyq oqý oryndarynyń strategiialyq seriktesteri anyqtaldy. Qazirgi kezde bes jyldyq damý jospary daiyndalýda. Finliandiianyń tájiribesi negizinde bakalavriat boiynsha medbikelik bilimdi jańǵyrtý sharalary da qolǵa alyndy. Búginde alty kolledjde pilottyq joba aiasynda 320 adam dáris alýda», - dedi L.Aqtaeva búgin Úkimette ótken baspasóz máslihatynda. Alaida dáris alyp jatqandardyń barlyǵy birdei aýylǵa barmaidy. Sebebi olardy mindetti túrde aýyldyq jerlerge jiberý qarastyrylmaǵan.
QR Densaýlyq saqtaý ministrligi jobalardy basqarý departamentiniń direktory Timýr Sultanǵazievtiń sózine qaraǵanda, jańa júie boiynsha bilim alyp jatqan mamandar aýylǵa bara ma, joq álde qalada qala ma ony ózderi sheshedi. «Negizi, jergilikti bilik, iaǵni ákimdikter meditsinalyq kolledjdermen bailanys ornatyp, mamandardy ózderine shaqyra alady. Sóitip, aýyldyń meditsinasyn kóterýge múmkindik bar. Sosyn qazirgi fin modeli boiynsha qolǵa alynǵan sharalar bolashaqta barlyq respýblikaǵa taralady. Demek, ol tájiribe aýylǵa da jetedi», - dep atap kórsetti T.Sultanǵaziev.
.jpeg)