Aýyldaǵy eńbekke qabiletti adamdardyń 40 paiyzy bolashaqta qalaǵa kóshkisi keledi. Bul týraly Senat depýtaty Aqylbek Kúrishbaev málim etti, dep habarlaidy "Ult aqparat".
«Arnaiy júrgizilgen saýalnamaǵa qatysýshylar aýyldyq jerdegi eń basty qiyndyq retinde jumyssyzdyqty, jumys oryndaryn ashý kerektigin atap kórsetken. Eńbekke qabiletti adamdardyń 40 paiyzy bolashaqta qalaǵa kóshýdi josparlap otyr. «Diplommen aýylǵa!» baǵdarlamasynyń júzege asyrylýy da bizdi qatty alańdatady. Eger agrarlyq mamandyqtar boiynsha memlekettik granttarmen oqyǵan túlekterdiń jyl saiyn tek 30 paiyzy aýylda jumysqa ornalasatynyn eskersek, onda biýdjetten bólingen 7 mlrd teńgeniń tiimsiz paidalanylyp jatqanyn baiqaýǵa bolady. Sondyqtan biz jas mamandardy aýylǵa tartý úshin jańa tiimdi mehanizmderdi qoldanýymyz kerek. Resei men Belarýs memleketteri siiaqty aýylǵa qonys aýdarýshylar úshin turǵyn úiler salýdy qolǵa alý qajet», - dedi A. Kúrishbaev Senattaǵy aýyldyq aýmaqtardy damytý jónindegi parlamenttik tyńdaýda.
Senatordyń aitýynsha, agrarlyq mamandyqtar boiynsha bitirýshi kýrs stýdentteri arasynda júrgizilgen saýalnama qorytyndysy kórsetkendei, olardyń 72 paiyzy aýyldyq jerge jumysqa barǵysy kelmeidi. Basty sebepteri: qaladaǵydai jaǵdaidyń bolmaýy, jalaqynyń tómendigi jáne turǵyn úimen qamtamasyz etilmeýi.
«Qazirgi ýaqytta aýyldyq aimaqtardy damytý «Aýyl – El besigi» jobasy aiasynda retteledi. Sózsiz, ony júzege asyrý barysynda aýyldardyń áleýmettik jáne injenerlik infraqurylymyn damytýda, kóptegen jetistikterge qol jetkizildi.
Degenmen, bizdiń saraptamalyq taldaýymyz kórsetkendei, bul jobanyń biraz kemshilikteri bar. Birinshiden, aýyldyq aýmaqtardy damytý máselelerinde ortalyq jáne jergilikti atqarýshy organdardyń jumystary naqty úilestirilmegen. Bul protseske jergilikti ózin-ózi basqarý organdary men jergilikti qoǵamdastyqtar tartylmaǵan», - dedi depýtat.
«Ekinshiden, solardyń bárin ekonomikanyń agrarlyq sektoryn damytýdyń memlekettik saiasatymen tikelei bailanystyra alatyn biryńǵai júieniń is júzinde joqtyǵy. Bul jumysta damyǵan elderdiń tájiribesine súiený oryndy. Óitkeni bizdi kútip turǵan máselelerdi ol elder áldeqaida bastan ótkergen. Olardyń pikirinshe, mundai baǵdarlamalar ministrlikter ázirlegen «kabinettik sheshimderge» negizdelmeýi kerek. Bul memleketterde aýyl turǵyndary eldi mekenin damytýdaǵy basym baǵyttardy ózderi belgileidi», - dedi Aqylbek Kúrishbaev.
