- Úkimettiń búgingi otyrysynda Premer-ministrdiń orynbasary Imanǵali Tasmaǵambetov pediatrlardy daiarlaý máselesin kóterdi. Onyń aitýynsha, búginde pediatriia fakýltetterin qaita ashý qajet, dep xabarlaidy QazAqparat tilshisi Úkimet úiinen.
«Búginde bala densaýlyǵyn qorǵaý salasynda qordalanyp qalǵan máseleler de bar. 2007 jylda meditsinalyq joǵary oqý oryndary maman daiarlaýdyń jańa júiesine kóshken bolatyn. Osynyń saldarynan pediatriia fakýlteti jalpy meditsinalyq baǵytqa kirip ketken. Endi, pediatr bolý úshin rezidentýrany bitirý kerek.
Sol sebepti túlekter pediatriia siiaqty mamandyqqa kóp qyzyqpaidy», - dedi I.Tasmaǵambetov. Resmi málimetke sáikes, 2012 jyly bes meditsinalyq joǵary oqý ornynda 742 pediatr daiarlansa, 2013 - 423 pediatr, al 2014 tek 4 adam ǵana pediatr bolyp shyqqan.
«Sonyń saldarynan qazirdiń ózinde pediatrlardyń tapshylyǵy sezilip otyr. 2012 jyly 10 myń adamǵa 4 pediatr kelse, ótken jyly atalǵan kórsetkish úshke deiin azaidy. Al Atyraý, Batys Qazaqstan men Pavlodar oblystarynda 10 myń aýyl xalqyna bir-aq pediatr qyzmet kórsetedi. Osyǵan bailanysty qoǵam ishinde úlken alańdaýshylyq bar. Sondyqtan kelesi jyldan bastap meditsinalyq joǵary oqý oryndarynda pediatriia fakýltetterin ashýdy usynamyn. Tiisti tapsyrma berýińizdi suraimyn», - dep atap kórsetti I.Tasmaǵambetov.
.jpeg)