Qairat Mámi Joǵarǵy sottyń keńeitilgen otyrysy barysynda sottyń sheshimderine narazy azamattardan kóp shaǵym túsip jatqanyn aitty, - dep habarlaidy "Ult aqparat" kaz.tengrinews.kz portalyna silteme jasap.
Qairat Mámi Pavlodar oblysynda bolǵan jaǵdaidy mysalǵa keltirdi. Onda aýyl turǵyndary daýly oqiǵany sottyń kómegimen de sheshe almai jatyr.
"Aqsýdaǵy jáne Pavlodar oblysyndaǵy aýyl turǵyndary Joǵarǵy sotqa birneshe ret shaǵym túsirdi. Olar Prezidentke de birneshe ret shaǵymdanǵan bolatyn. Oǵan sebep - aýyl turǵyndary arasyndaǵy, egde jastaǵy adamdardyń arasyndaǵy túsinispeýshilikter: balaǵattady, shyǵyn keltirdi degen aiyptaýlar", - dedi Qairat Mámi.
Sondai-aq, ol bul istiń sotqa jetkenin, alaida máseleniń sheshilmegenin aitty. "Adamdar jazǵan shaǵymdarynda oralmandar ekenin kórsetedi. "Biz saýatsyzbyz, zańdy bilmeimiz. Sotqa shaqyrsa, barmaimyz. Aýdanda eki sýdia bar - ekeýi de orys tilinde sóileidi, qazaqsha múlde saýatsyz. Oblystyq sottyń tóraǵasy Smaǵulov ózi jaza ala ma? Bar ma sonda, tiri me?", - dep oqydy shaǵymdy Joǵarǵy sottyń tóraǵasy Pavlodar oblystyq sotynyń tóraǵasyna.
"Sýdialardyń halyqpen jumys istep jatqany qaida, tóraǵanyń atqarǵan jumysy qaida? 70 jastaǵy aýyl turǵyndary arasyndaǵy máseleni aýdan nemese oblys tóńireginde sheshý múmkin bolmai tur ma? Al myna 2016 jyldyń 2 jeltoqsanynda jazylǵan shaǵym sizge arnalady, Smaǵulov myrza (Pavlodar oblystyq sotynyń tóraǵasy - avtor.). Qabyldanǵan sharalar jaily málimet kelip túsken joq. Siz turǵyndardan kelgen shaǵymdarmen qatar, Joǵarǵy sottan kelgen hattardy da oqymaityn shyǵarsyz? Siz ózi jumysqa barasyz ba?", - dedi Qairat Mámi.
"Turǵyndardyń ózin-ózi jazalaýyn kútip otyrsyz ba? Álde qaitadan respýblika boiynsha atymyzdy shyǵaramyz ba? Osy máseleni sheshýge on kún beremin", - dedi Joǵarǵy sot tóraǵasy.
