Memleket aýyl sharýashylyǵyn sýbsidiialaýda tehnikalyq jáne tehnologiialyq jańarýǵa baǵyttalǵan investitsiialyq sýbsidiialarǵa basymdyq beredi. Bul týraly QR Premer-Ministri Álihan Smaiylov Májilis depýtattarynyń saýalyna joldaǵan jaýabynda jazdy, dep habarlaidy QazAqparat.
«Agroónerkásip keshenin memlekettik qoldaýdy jetildirý jónindegi jumys toby quryldy. Oǵan salalyq qaýymdastyqtar men odaqtardyń, agrobiznestiń, ǵylymnyń, múddeli memlekettik jáne jergilikti atqarýshy organdardyń, Parlament Senaty men Májilis depýtattarynyń ókilderi kirdi. Jumys toby otyrystarynyń sheńberinde sýbsidiialaý rásimin ońailatýdy, onyń baǵyttaryn ońtailandyrýdy (sýbsidiialar túrleriniń sanyn 51-den 7-ge deiin qysqartý josparlanyp otyr), barlyq sýbektiler úshin qoljetimdilikti qamtamasyz etýdi, zamanaýi tehnologiialardy engizýdi yntalandyrýdy jáne agroónerkásip keshenine investitsiialar tartýdy, naqty indikativtik kórsetkishterge qol jetkizý boiynsha fermerlerdiń qarymta mindettemeler alý normasyn engizýdi kózdeitin jańa tásilder tanystyryldy», - delingen Úkimet basshysynyń jaýabynda .
Premer-Ministrdiń málimeti boiynsha, sýbsidiialaýdyń jańa júiesine kóptegen usynystar túsken.
«Sýbsidiialaýdyń basym baǵyttary retinde salany tehnikalyq jáne tehnologiialyq qaita jaraqtandyrýǵa, qarjy quraldary boiynsha mólsherlemelerdi sýbsidiialaýǵa, sondai-aq selektsiialyq-asyl tuqymdy, tuqym sharýashylyǵyn, shikizatty tereń qaita óńdeýdi sýbsidiialaýǵa baǵdarlanǵan investitsiialyq sýbsidiialaýdy aiqyndaý usynylady.
Bul ózgeristerdi biyl iske asyrý josparlanǵan bolatyn. Sonymen qatar, aǵymdaǵy ahýaldy jáne onyń damý úrdisin keshendi taldaýdy, geosaiasi daǵdarystyń el ekonomikasyna teris áserin azaitý boiynsha ońtaily sharalar qabyldaý qajettiligin negizge ala otyryp, sýbsidiialaýdyń jańa tetigin engizý máselesin kelesi jylǵa qaldyryp, biyl memlekettik qoldaýdy qoldanystaǵy qaǵidalar boiynsha júzege asyrý týraly sheshim qabyldandy», - dedi Álihan Smaiylov.
