Ulttyq qoǵamdyq senim keńesiniń múshesi, «Qazaq ádebieti» gazetiniń bas redaktory Dáýren Qýat jer máselesine qatysty pikir bildirdi, dep habarlaidy QazAqparat.
«Jer – ulttyń, memlekettiń menshigi. Bir memleket ekinshi memleketke jerin satpaidy. Jerdi soǵys jaǵdaiynda tartyp alý ǵana múmkin. Beibit túrde, komertsiialyq maqsatta jer satý degen bolmaidy. Jerdi satý – aqymaqtyq, al qazaq aqymaq emes. Jerdi el igiligine paidalana bilý kerek. Ol úshin aýyl sharýashylyǵynda jumys istep jatqan adamdarǵa memleket tarapynan qoldaý qajet, olarǵa arnalǵan memlekettik baǵdarlamalar bolýy kerek», - deidi «Qazaq ádebieti» gazetiniń bas redaktory Dáýren Qýat.
Ol qazirgi ýaqytta jerdi igerýdiń, óńdeýdiń jańa tehnologiiasy kóp ekenin aitty.
«Osy turǵyda basqa memlekettermen tájiribe almasyp kórý kerek. Jańa tehnologiiany meńgerý arqyly jerdi igiligimizge jarata bilý kerek. Al jerdi satý – satqyndyq. Barlyq memleket basshylary jer úshin soǵysqan, biraq satpaǵan», - deidi ol.
Eske sala ketsek, QR Prezidenti Qasym-Jomart Toqaev Qazaqstan halqyna Joldaýynda jerimiz sheteldikterge satylmaitynyn aitqan bolatyn.
«Kelesi jyly aýyl sharýashylyǵy maqsatyndaǵy jerlerde paidalaný máselesi boiynsha Jer kodeksiniń keibir normalaryna engizilgen moratorii kúshin joiady. Jerimiz sheteldikterge satylmaidy», - dedi Memleket basshysy.
