Energetika ministrligi Aýyl sharýashylyǵy ministrligimen birigip kóktemgi egis jumystaryn júrgizý úshin aýyl sharýashylyǵy taýar óndirýshilerine 1 litri úshin 165 teńge arzandatylǵan baǵamen 386 tonna dizel otynyn bóldi. Bul týraly QR Energetika ministri Nurlan Noǵaev halyq aldynda esep berý kezdesýinde aitty, dep habarlaidy QazAqparat.
«Búkil álemdi sharpyǵan pandemiiaǵa bailanysty janar-jaǵarmaiǵa tutynýshylyq aitarlyqtai tómendedi. Elimizde engizilgen karantindik sharalarǵa bailanysty ótken ailarda munai ónimderin tutyný aitarlyqtai azaidy. Qazaqstanda janar-jaǵarmaidy tutynýdyń tómendeýi munaidy qaita óńdeýge arnalǵan josparly kórsetkishterdi ózgertý qajettiligine alyp kelgen joq, iaǵni ol 17 mln tonna deńgeiinde qaldy», - deidi QR Energetika ministri Nurlan Noǵaev.
Onyń aitýynsha, qazaqstandyq munai óndeý zaýyttaryn jabdyqtaý nátijesinde búgingi tańda ishki naryqtyń qajettiligin tolyǵymen ózimiz qamtamasyz etip otyrmyz.
«2019 jyldyń qorytyndysy boiynsha óz elimizde óndirilgen benzin, dizel otyny, aviakerosin jáne mazýtpen naryqtyń qamtamasyz etilýi 100%-ǵa jetti. 2019 jyly shildede tyiym salyný alynǵannan keiin Eýropa jáne Ortalyq Aziia elderine benzinniń eksporty bastaldy. Byltyr benzin eksportynyń kólemi 181 myń tonnany qurady. Otandyq munai óńdeý zaýyttarynyń turaqty munai óńdeýdi qamtamasyz etýine jáne munai ónimderi qoimalarynyń tolyp ketýine jol bermeý maqsatynda ministrlik múddeli organdarmen birlesip mynadai sharalar qabyldady: birinshi, munai ónimderin avtokólikpen Qazaqstannan tys jerge áketýge salynǵan tyiym alynyp tastaldy. Munai ónimderin Keden odaǵy elderi sheginen tys jerge áketýge salynǵan tyiym alynyp tastaldy. Eksportqa ótkiziletin benzin men dizel otyny boiynsha aktsizdeletin taýar óndirýshiler aktsiz tóleýden bosatyldy. Reseiden Qazaqstanǵa benzin men dizel otynyn temirjolmen jetkizýge tyiym salyndy. Munai ónimderine, onyń ishinde benzin, dizel otyny men mazotqa kedendik áketý bajynyń mólsherlemesi joiyldy. Memleket basshysynyń tapsyrmasyna sáikes, ministrlik Aýyl sharýashylyǵy ministrligimen birigip kóktemgi egis jumystaryn júrgizý úshin aýyl sharýashylyǵy taýar óndirýshilerine 1 litri úshin 165 teńge arzandatylǵan baǵamen 386 tonna dizel otynyn bóldi. Qazirgi tańda ministrlikke qosymsha 60 myń tonna dizel otynyn bólý jóninde usynys kelip tústi. Biz bul máseleni qarastyrýdamyz. Bul sharalar kóktemgi egis jumystaryn turaqty júrgizýge baǵyttalǵan», - deidi ol.
