Biyl aýyl sharýashylyǵy ónimderin óńdeý salasynda 29 joba paidalanýǵa berildi. Bul týraly Aýyl sharýashylyǵy ministri Erbol Qarashókeev málim etti, dep habarlaidy QazAqparat.
«Aǵymdaǵy jyldyń 10 aiynda tamaq ónimderin óndirý kólemi 3,6%-ǵa ósip, 1,8 trln teńgeni qurady. Eseptik kezeńde tamaq ónimderi óndirisiniń negizgi kapitalyna salynǵan investitsiialar kólemi 5,9%-ǵa ulǵaiyp, 81,8 mlrd teńgeni qurady. Zattai mánde aǵymdaǵy jyldyń 10 aiynda jarma óndirý kólemi 5,3%-ǵa, krahmal ónimderin óndirý kólemi 18,7%-ǵa, jemis jáne kókónis shyryndaryn óndirý kólemi 2,8%-ǵa, qant óndirý kólemi 2,6 ese, qyshqyl sút ónimderin óndirý kólemi 5%-ǵa, sary mai óndirý kólemi 9%-ǵa artty», - dedi E. Qarashókeev Úkimet otyrysynda.
Onyń aitýynsha, un óndirý kólemi 4,5%-ǵa, ósimdik maiyn óndirý kólemi 3%-ǵa, shujyq ónimderin óndirý kólemi 0,4%-ǵa tómendedi.
«Biyl aýyl sharýashylyǵy ónimderin óńdeý salasynda 29 joba paidalanýǵa berildi, onyń ishinde jalpy qýaty 34 myń tonna et óńdeý boiynsha 6 joba, jańǵyrtý jáne qurylys esebinen jalpy qýaty 96 myń tonna sút óńdeý boiynsha 10 joba, 530 myń tonna maily daqyldar óńdeý boiynsha 3 joba jáne jylyna 200 myń tonna bidaidy tereńdete óńdeý boiynsha 1 joba, jalpy qýaty 23,5 myń tonna makaron jáne jarma ónimderin óndirý boiynsha 3 joba iske qosyldy. Búginde investitsiialyq jobalar pýlynda shamamen 100 joba bar. Bular - óndiristiń qosymsha ósimin jáne tiisinshe eksporttyń qosymsha kólemin qamtamasyz etýge múmkindik beretin óńdeý jónindegi jańa jobalar. Bul saiyp kelgende, óńdelgen ónimniń eksportyn ulǵaitý boiynsha qoiylǵan maqsatqa qol jetkizýge múmkindik beredi», - dedi ministr.
