QR Aýyl sharýashylyǵy ministrliginde kóktemgi egis jumystaryna daiyndyq jáne ony ótkizý máseleleri boiynsha keńeitilgen keńes ótti. Beinekonferentsiia bailanysy arqyly oǵan oblys ákimdikteriniń ókilderi qatysty, dep habarlaidy "Ult aqparat" inistrliktiń baspasóz qyzmetine silteme jasap.
Keńeste egis alqaptaryn, aýyl sharýashylyǵy tehnikasyn, tuqym men tyńaitqyshtardy daiyndaý, sondai-aq fermerlerdiń janar jaǵarmaimen qamtamasyz etilýi jáne kóktemgi egis jumystaryn qarjylandyrý barysy talqylandy.
Jiyn barysynda Aýyl sharýashylyǵy ministri Saparhan Omarov jergilikti atqarýshy organdar ókilderine oblystaǵy egin naýqanyna qatysty jaǵdaidy ashyq aitýǵa jáne ministrlikke naqty aqparat berýge shaqyrdy.
«Bizge aqparatty durys berińizder, erteń ár tsifr úshin jaýap beresizder, óńirlerdiń jaǵdaiyn ashyq aityńyzdar, biz bilip otyraiyq», - dep atap ótti S.Omarov.
Sonymen qatar, is-shara barysynda agrariiler qazirgi tótenshe jaǵdai kezinde egiske jumyldyrylǵan adamdar men tehnikanyń erkin qozǵalýy týraly máseleni kóterdi. QR AShM jergilikti atqarýshy organdarǵa fermerlerdi qajetti ruqsatnamalarmen múmkindiginshe jyldam qamtamasyz etýdi talap etti.
Buǵan deiin habarlanǵandai, biyl aýyl sharýashylyǵy daqyldaryn 22,5 mln gektar jerge egý josparlanyp otyr.
Bul rette, egis alqaptaryn ártaraptandyrý jáne rentabeldiligi joǵary daqyldardy óndirýge kóshý sheńberinde dándi jáne dándi-burshaqty daqyldar kólemi azaiady, al maily, kókónis-baqsha jáne jem-shóp alqaptary aitarlyqtai ulǵaiady.
Qazirgi ýaqytta egis naýqany elimizdiń ońtústik óńirlerinde - Jambyl, Túrkistan, Almaty jáne Qyzylorda oblystarynda belsendi júrgizilýde.
