QR aýyl sharýashylyǵy ministri Saparhan Omarov Maqtaaral aýdanyna bardy, – dep habarlady Túrkistan oblysy ákiminiń baspasóz qyzmeti.
Vedomstvonyń málimetinshe, ministrmen birge oblys ákimi Ómirzaq Shókeev erip júrdi.
Eń aldymen olar Maqtaaral aýyldyq okrýgi, «Aq altyn» eldimekenindegi «AShM servis-ortalyǵy» óndiristik kooperativiniń maqta terimi naýqanymen tanysty. Onda biyl 70 ga jerge M-4011 maqta sorttyq tuqymyn egip, 25,0 ts/ga túsimdilikpen ónim alýda. Búgingi tańda 43 adamdy jumyspen qamtyp otyrǵan óndiristik kooperativi 58 birlik aýyl sharýashylyǵy tehnikasymen jabdyqtalǵan.
Jalpy biyl oblysta 131 myń ga maqta egelip, 340 myń tonnadan astam ónim jinaý josparlanýda. Onyń 320 myń tonnasy jinaldy.
«Maqta sharýashylyǵyndaǵy negizgi másele – «aq altynnyń» baǵasy. Búgingi tańda Maqtaaral aýdanyndaǵy zaýyttar maqtanyń tonnasyna 100 myń teńgeden avans berip jatyr. Alaida, áli kúnge deiin naqty baǵa bekitpegen. Ministr men oblys ákimi dál osy máseleni sheshý úshin Atakent kentindegi «Qazaq maqta sharýashylyǵy ǵylymi-zertteý institýty» JShS-inde aýdannyń maqta óńdeý zaýyttarynyń basshylary men aýyl sharýashylyǵy taýaryn óndirýshilermen kezdesý jiynyn ótkizdi. Jiyn barysynda oblys ekonomikasynyń eń mańyzdy salasynyń biri – maqta sharýashylyǵynyń ózekti máseleleri talqylanyp, oblys ákimdigi tarapynan Qazaqstan Respýblikasy Aýyl sharýashylyǵy ministrligine tiisti usynystar engizildi» delingen habarlamada.
Bul rette, Saparhan Omarov aitylǵan usynystardy qoldaityndyǵyn, aldaǵy ýaqytta Úkimet deńgeiinde kóterip, oń sheshimi tabylatyndyǵyn aitty. Óz kezeginde, Ómirzaq Shókeev shitti maqta baǵasy aldaǵy kúnde turaqtaityndyǵy, sharýalardyń suranystary boiynsha tiimdi baǵa bekitiletinin jetkizdi.
Al, zaýyt basshylary maqta baǵasyn bekitý úshin 3 kún merzim surady.
Sapar sońynda ministr Sairam aýdanynda ornalasqan «Dala-fruit.kz» JShS intensivti alma baýyna jáne «Nurym Grýpp» JShS 10 myń basqa arnalǵan mal bordaqylaý alańynyń jumysymen tanysty. Sondai-aq, oblysta aýyl sharýashylyǵy salasynda atqarylyp jatqan jumystarǵa oń baǵasyn berdi.
