Foto: Aqorda
Prezident Aýyl sharýashylyǵy ministri Aidarbek Saparovty qabyldady, dep habarlaidy Ult.kz.
Kezdesý barysynda Memleket basshysyna agrarlyq salanyń 2024 jyldyń on aiyndaǵy damý qorytyndysy usynyldy. Ministrdiń aitýynsha, negizgi makrokórsetkishter boiynsha oń dinamika baiqalǵan.
Óndiris jáne eksport ósimi
Aidarbek Saparov esepti kezeńde aýyl sharýashylyǵy ónimderiniń jalpy kólemi 8,1 trillion teńgege jetip, ótken jylmen salystyrǵanda 5,4% artqanyn atap ótti.
Azyq-túlik óndirisi 9% ósip, 3,1 trillion teńgege jetti.
Agrosektor taýarlarynyń eksporty 4,7 mlrd dollarǵa deiin ulǵaiǵan.
Salany qoldaý sharalary
Sońǵy eki jylda agroónerkásip keshenin damytý úshin birqatar júieli sharalar qabyldanǵan.
Sonyń ishinde:
– Ainalym qarajatyn tolyqtyrý jáne aýyl sharýashylyǵy tehnikasyn lizingke alý úshin 5% mólsherlememen tikelei nesie berý bastaldy;
– Prezident tapsyrmasy boiynsha agrosektordy qarjylandyrý kólemi 1 trillion teńgege deiin artty. Onyń 250 mlrd teńgesi tehnikaǵa jeńildetilgen lizingke baǵyttalǵan;
– Biyl 25 myńnan astam tehnika satyp alynyp, mashina-traktor parkiniń tozýy 90%-dan 70%-ǵa tómendedi;
– Mal sharýashylyǵyn damytýdyń keshendi jospary daiyndalyp jatyr;
– «e-AÓK» biryńǵai tsifrlyq ekojúiesin qurý jumystary bastalǵan. Platforma sýbsidiialaý, jer qory, egin, mal jáne balyq sharýashylyǵyna qatysty málimetterdi bir arnaǵa biriktiredi.
Prezidenttiń tapsyrmalary
Qasym-Jomart Toqaev aýyl sharýashylyǵy eńbekkerleriniń forýmynda berilgen tapsyrmalardyń sapaly oryndalýynyń mańyzyn atap ótti.
Memleket basshysy salanyń tiimdiligin arttyrý, agrosektordyń turaqty damýyn qamtamasyz etý jáne eldiń azyq-túlik qaýipsizdigin kúsheitý baǵytynda birqatar naqty mindet júktedi.
