Jigýli Dairabaev"Aýyl" partiiasynan prezidenttikke kandidat retinde usynyldy, - dep habarlaidy "Ult aqparat".
Astanada "Aýyl" halyqtyq-demokratiialyq patriottyq partiiasynyń kezekten tys XX sezi ótti. Jinalysta partiia músheleri Jigýli Dairabaevtyń aldaǵy prezidenttik sailaýǵa kandidat retinde kandidatýrasyn qoldady.
"Qurmetti partiialastarym, sizderdiń senimderińizdi aqtaimyn. Bar kúshimdi Qazaqstannyń jáne agroónerkásiptik keshenniń damýyna salamyn", - dedi Dairabaev.
67 jastaǵy Jigýli Moldahalyquly Jambyl oblysynyń Jalpaqsaz aýylynda dúniege kelgen. Áskerden keiin bir jyldai qoishynyń kómekshisi, odan keiin kolhozda júrgizýshi bolyp jumys istegen.
Artynan partiialyq qyzmetpen ainalysqan. Lýgovskoi aýdanynda "Kommýnizmge jol" kolhozynda komsomol komitetiniń hatshysy, instrýktor, kásipodaq tóraǵasy boldy. Al 1980 jyly Kamenskii aýylynda atqarýshy komitettiń tóraǵasy bolyp taǵaiyndaldy. Bes jyldan keiin qoi ósiretin "Alǵabas" sovhozyna partiia komitetiniń hatshysy bolyp bardy.
1987 jyly Jambyl atyndaǵy kolhozdy basqarýǵa kiristi. Al 1995 jyly Qoraǵaty sovhozynyń direktory bolyp taǵaiyndaldy. Eki jyldan keiin Turar Rysqulov aýdanynyń statistika basqarmasynyń basshysy bolyp aýysty.
2000 jyldan keiin biznespen ainalysty, nan qabyldaý oryndaryn basqardy. "MOLBAL" JShS bas direktory boldy. Qazaqstan fermerleri odaǵynyń oblystyq filialyna jetekshilik etti. Al 2019 jyldan bastap uiym basshysy qyzmetine sailandy. Biyl maýsym aiynda "Atameken" UKP agroónerkásip komitetiniń tóraǵasy bolyp taǵaiyndaldy.
Úilengen, úsh balasy men jeti nemeresi bar.
Eske salaiyq, Qazaqstanda kezekten tys sailaý biyl 20 qazanda ótedi.
