«Aýyl» partiiasy aýyl sharýashylyǵy taýarlaryn óndirýshilerge jyldyq ótemaqysy 2 paiyzdy quraityn nesie berý júiesin usynady. Bul týraly «Aýyl» halyqtyq-demokratiialyq patriottyq partiiasynyń tóraǵasy Áli Bektaev aitty, dep habarlaidy QazAqparat.
«Qazagro» holdingi men onyń enshiles uiymdaryna jyl saiyn qomaqty soma bólinse de, sharýalardyń qarjy qajettiliginiń jartysy ǵana ótelýde. Nesie syiaqysyn sýbsidiialaý baǵdarlamasy jasalsa da, ekinshi deńgeili bankterdiń aýyl sharýashylyǵyna bet burǵysy joq. Biz ózimizdiń sailaýaldy baǵdarlamamyzda aýyl sharýashylyǵy taýarlaryn óndirýshilerine uzaq merzimdi, jyldyq ótemaqysy 2 paiyzdy quraityn nesieler berý júiesin qalyptastyrýdy usynyp otyrmyz. Osyndai qoldaý arqyly ǵana aýyl óndirisin kóterýge bolady dep esepteimiz», - dedi ol partiianyń kezekten tys XVIII sezinde.
Onyń paiymynsha, memleketimizde agrarlyq sektor ekonomikany alǵa súireitin lokomotiv bolatynyna kúmán joq.
«Aýyl sharýashylyǵy bolashaqta munai men gaz siiaqty jerasty bailyqtarynyń ornyn basatyn jerdiń ústindegi altyn qazynaǵa ainalatyn múmkindigi bar. «Altyn, kúmis – tas eken, arpa, bidai as eken», - degen máteldiń zamany keldi. Adamǵa qymbat úi, kiim, kólik emes, eń aldymen as kerek, sol arqyly myqty densaýlyq kerek», - dedi Áli Bektaev.
