Shyn máninde aýyl damymai, memleket damymaidy. Bul týraly QR Parlamenti Senatynyń Tóraǵasy Máýlen Áshimbaev aitty, dep habarlaidy QazAqparat.
«Qazaqstannyń halqynyń 41 paiyzyn aýyl turǵyndary qurap otyr. Aýyldyq ekonomikalyq, demografiialyq jáne mádeni áleýeti zor. Sondyqtan búgin talqylanyp otyrǵan másele memleketimizdiń ary qarai damýy úshin úlken mańyzǵa ie. Shyn máninde aýyl damymai, memleket damymaidy. Sońǵy jyldary Qazaqstanda aýyldyq aýmaqtardy tiimdi damytý úshin mańyzdy qadamdar jasalýda. 2019 jyldan bastap «Aýyl – El besigi» jobasy iske asyrylyp keledi. Degenmen búginde jaǵdai túbegeili jaqsaryp ketti dep aita almaimyz. Qazirgi kezde elimizde 6322 aýyl bar. Ulttyq ekonomika ministrliginiń baǵalaýy boiynsha onyń 3,5 myńynda nemese 56 paiyzynda ǵana damýǵa qajetti áleýet bar», - dedi M. Áshimbaev Senattaǵy aýyldyq aýmaqtardy damytý jónindegi parlamenttik tyńdaýda.
Onyń sózine qaraǵanda, aýyldar áleýmettik ári turmystyq jailylyq infraqurylym jaǵynan artta qalyp otyr. Áli kúnge deiin aýyz sýdy tasyp ishetin aýyldar bar.
«Aýyldardyń 69 paiyzy internetke qosylǵan degen aqparat bar. Biraq internet bar jerlerdiń ózinde bailanys sapasy syn kótermeidi. Ár besinshi aýylda bilim berý nysandary jóndeýdi qajet etedi. Densaýlyq saqtaý mekemeleriniń de jaǵdaiy máz emes, olardyń úshten birine jóndeý jumystaryn júrgizý kerek. Kadr tapshylyǵy da úlken másele», - dedi Máýlen Áshimbaev.
