Aýyl ákimderin tikelei sailaý sheshimderdiń sapasy men tiimdiligin jaqsartady. Mundai pikirdi Qazaqstannyń strategiialyq zertteýler institýty Áleýmettik-saiasi zertteýler bóliminiń aǵa ǵylymi qyzmetkeri Janar Sanhaeva bildirdi, dep habarlaidy QazAqparat.
«Jan-jaqty maǵynada alyp qarar bolsaq, sailaý sailaýshylarynyń múddesin bildirip, olardyń atynan sheshim qabyldaityn laýazymdy tulǵany jáne depýtatty sailaý quraly ekendigi belgili. Osydan-aq aýyl ákimderin sailaý aýyl turǵyndaryn jergilikti aýmaqtardy basqarýǵa tartý jáne oǵan qatysýyn keńeitýdiń negizgi tetigi ekendigin baiqaýǵa bolady. Degenmen, Qazaqstanda aýyl ákimderin sailaý memlekettik basqarýdy ortalyqsyzdandyrý jáne jergilikti ózin ózi basqarý men jergilikti demokratiia institýttaryn kúndelikti tájiribege engizýde mańyzdy baǵyttardyń biri bolyp qala beredi», - dedi ol QazAqparat tilshisine bergen suqbatynda.
Sarapshynyń atap ótýinshe, búginde Qazaqstandaǵy aýyl turǵyndarynyń úlesi el azamattary sanynyń shamamen 40 paiyzyn quraidy. Búginde olardyń múddesin aýyl ákimderin tikelei sailaýǵa deiin tek aýdandyq depýtattar ǵana bildirip keldi. Osy rette buǵan deiin aýyl ákimderi aýdandyq depýtattardyń-sailaýshylardyń janama sailaýy arqyly taǵaiyndalyp kelgendigin atap ótken jón. Demek, elimizde sońǵy 20 jyl boiy aýyl ákimderin janama sailaý tájiribesiniń bar ekendigin eskerer bolsaq, endigi ýaqytta olar tikelei sailaýǵa negizi bar deýge bolady.
«Aýyl ákimderin tikelei sailaýdan kútiletin nátije retinde jergilikti jerlerde qabyldanatyn sheshimderdiń sapasy men tiimdiliginiń arta túsetindigin aitýǵa bolady. Oǵan eki faktor septigin tigizedi. Birinshiden, qabyldanatyn sheshim árbir aýyldyń qajettiligine bailanysty júzege asyrylady. Qazaqstanda bir-birimen aiyrmashalyǵy bar 2 myńnan astam aýyl bar jáne aýyl ákimderin tikelei sailaý institýty olardy basqarýda biregei ádis qalyptastyrýǵa septigin tigizedi. Ekinshiden, aýyl basshysynyń kelesi merzimge qaita sailanýy sailaýshylarǵa, iaǵni naqty aýyl turǵyndary tarapynan qoldaýǵa bailanysty. Degenmen, turǵyndar da óz ókilettikterin sailanatyn ákimge berý arqaly jasaǵan tańdaýy úshin jaýapkershilik arqalaityndyǵyn bilýi tiis», - dedi Janar Sanhaeva.
