Balam barlyq oqýshymen birdei mektepke baryp, bilim alýǵa tolyq quqyly. Bul týraly «Kerýen» saýda ortalyǵynda ótip jatqan aýtizm máselesin aqparattandyrý naýqanynda 8 jasar Erasyldyń anasy Gaýhar Múginova aitty, dep habarlaidy Vaq.kz tilshisi.
Gaýhar Múginova – búgingi naýqandy qoldaý úshin arnaiy kelgen ata-analardyń biri.
«Búgingi naýqandy qoldaýǵa keldim. Sebebi aýtizm problemasy bar. Ony jasyrmai, kerisinshe, úide oqyp júrgen balalardy syrtqa shyǵaryp, mektepke berý kerek. Basqa ata-analar da óz balalaryn qolǵa alyp, qoǵamdyq ortaǵa shyǵarǵanyn qalaimyn», - dedi ol.
Ol óz balasynyń aýtistikalyq spektr aýytqýlary baryn kesh bilip qalǵanyn aitty.
«Balam eki jarym jasynda sóileýi keshigip jatqanyn baiqadym. Dárigerler túrli em aitty, logopedke bardyq. Sóileýi, damýy keshigip jatyr degen diagnozben júrdik. Biraq ózim ishtei kúmándandym. Aýtizm bar dep oiladym. Sheteldik dárigerlerge bardyq. Tekserdi. Men oilaǵan diagnozdy rastady. Sodan keiin esepke qoidyq. Múgedektik aldyq. Jasy úlkeigen soń basqa balalarmen aralasyp, qoǵamǵa beiimdelý kerek dep oiladyq ta, arnaiy mamandar izdedik. 2017 jyly 8 jasqa tolǵanda osy Astanadaǵy №83 mekteptiń 1-synybyna berdik. Qazir basqa balalarmen bir synypty bilim alyp jatyr», - dedi Gaýhar Múginova.
Erasyldyń anasy balasyna arnaiy tiýter taýyp, onyń jalaqysyn ózi tóleitinin jetkizdi.
«Men balama tájiribesi bar tiýter izdedim. Taptym. Aiyna 70 myń teńge jalaqy tóleimin. Óitkeni, balama da, ózge balalarǵa da yńǵaily bolsyn degen oimen tájiribeli maman tańdadym», - dedi ol.
Gaýhar Múginova aýtizm diagnozy bar balalardyń ata-analaryna balalaryn úide ustap otyrmaýǵa keńes berdi.
«Ózge ata-analarǵa mektep tarapynan tiýter beriledi. Solardan tańdaýǵa bolady. Iaǵni, inkliýzivti synyby bar mektepke berý úshin sál qimyldaý kerek. Balany úide ustap, otyra bergennen túk shyqpaidy. Ár ata-ana balasyna ózi jaýapty. Sondyqtan «Bolashaq» korporativtik qoryna kelip, keńes surasyn. Olar qaida barý kerek, kimge barý kerek... barlyǵyn túsindiredi», - dedi ol.
.jpeg)