Qazaqstandyq, álemniń 28-raketkasy Iýliia Pýtintseva Aýstraliia ashyq chempionatynyń ekinshi ainalymyna shyqty, dep habarlaidy "Ult aqparat".
Birden aitý kerek, qazaqstandyq tennisshige qiyn qarsylas tap keldi.
Amerikalyq Sloan Stivens qazirgi kezde dúniejúzilik reitingide 41-satyda turǵanymen, 2017 jyly US Open týrnirin utqan tanymal sportshy.
Birinshi partiia barysynda esep 4:4 bolǵan mezette S.Stivens breik jasap ketti. Sodan keiin óz geimin jibermedi – 6:4. Al Iu.Pýtintseva set barysynda breik pointtarynyń birde-bireýin paidalana almady.
Amerikalyq tennisshi ekinshi partiiany breikpen bastady – 1:0. Degenmen Iýliia da qalyspai, tarazy basyn teńestire aldy – 2:2. Sosyn taǵy eki breik jasap, esepti 6:2-ge jetkizdi.
Úshinshi, sheshýshi sette S.Stivens breikpen alǵa shyqty – 2:1. Iu.Pýtintseva ile-shala ese qaiyrdy – 2:2. Taǵy bir breik – 4:2. Budan keiin qarsylastar breikpen almasty – 5:3. Qazaqstandyq tennisshi ekinshi matchbolyn múlt jibergen joq – 6:3.
Tartysty báseke 2 saǵat 10 minýtqa sozyldy.
Iu.Pýtintseva ekinshi ainalymda álemniń 67-raketkasy, belgiialyq Elison Van Eitvank nemese reitingte 237-satydaǵy frantsiialyq Klara Biýreldiń bireýimen sheberlik baiqasady.
