قازاقستاندىق, ەلەمنٸڭ 28-راكەتكاسى يۋلييا پۋتينتسەۆا اۋسترالييا اشىق چەمپيوناتىنىڭ ەكٸنشٸ اينالىمىنا شىقتى, دەپ حابارلايدى "ۇلت اقپارات".
بٸردەن ايتۋ كەرەك, قازاقستاندىق تەننيسشٸگە قيىن قارسىلاس تاپ كەلدٸ.
امەريكالىق سلوان ستيۆەنس قازٸرگٸ كەزدە دٷنيەجٷزٸلٸك رەيتينگٸدە 41-ساتىدا تۇرعانىمەن, 2017 جىلى US Open تۋرنيرٸن ۇتقان تانىمال سپورتشى.
بٸرٸنشٸ پارتييا بارىسىندا ەسەپ 4:4 بولعان مەزەتتە س.ستيۆەنس برەيك جاساپ كەتتٸ. سودان كەيٸن ٶز گەيمٸن جٸبەرمەدٸ – 6:4. ال يۋ.پۋتينتسەۆا سەت بارىسىندا برەيك پوينتتارىنىڭ بٸردە-بٸرەۋٸن پايدالانا المادى.
امەريكالىق تەننيسشٸ ەكٸنشٸ پارتييانى برەيكپەن باستادى – 1:0. دەگەنمەن يۋلييا دا قالىسپاي, تارازى باسىن تەڭەستٸرە الدى – 2:2. سوسىن تاعى ەكٸ برەيك جاساپ, ەسەپتٸ 6:2-گە جەتكٸزدٸ.
ٷشٸنشٸ, شەشۋشٸ سەتتە س.ستيۆەنس برەيكپەن العا شىقتى – 2:1. يۋ.پۋتينتسەۆا ٸلە-شالا ەسە قايىردى – 2:2. تاعى بٸر برەيك – 4:2. بۇدان كەيٸن قارسىلاستار برەيكپەن الماستى – 5:3. قازاقستاندىق تەننيسشٸ ەكٸنشٸ ماتچبولىن مٷلت جٸبەرگەن جوق – 6:3.
تارتىستى بەسەكە 2 ساعات 10 مينۋتقا سوزىلدى.
يۋ.پۋتينتسەۆا ەكٸنشٸ اينالىمدا ەلەمنٸڭ 67-راكەتكاسى, بەلگييالىق ەليسون ۆان ەيتۆانك نەمەسە رەيتينگتە 237-ساتىداعى فرانتسييالىق كلارا بيۋرەلدٸڭ بٸرەۋٸمەن شەبەرلٸك بايقاسادى.
