Qazaqstandyq Aleksandr Nedovesov juptyq synda Aýstraliia ashyq chempionatynyń ekinshi ainalymyna shyqty, dep habarlaidy QazAqparat.
Qazaqstan tennis federatsiiasy málim etkendei, A.Nedovesov pákstandyq Aisam-ýl-Hak Kýreshimen birge bastapqy kezdesýin jarystyń 7-raketkalary, frantsiialyqtar Nikolia Maiý – Fabris Martenmen ótkizdi.
Tartysty ótken match taǵdyry úshinshi sette sheshildi.
Qazaqstandyq-pákstandyq jup 7:6 (7:1), 5:7, 6:2 esebimen jeńiske jetti.
Nedovesov pen Kýreshi 2 saǵat 29 minýtqa sozylǵan báseke barysynda 11 eis jasap, úsh breikke qol jetkizdi. Endi olar ekinshi ainalymda taǵy bir qazaqstandyq Aleksandr Býblik – Polsha ókili Ian Zelinski nemese amerikalyq Markos Hiron – ońtústikkoreialyq Sýn Vý Kvon juptarynyń qai jeńgenimen kezdesedi.
Nikolia Maiý taǵy bir frantsiialyq Per Erbermen birge ótken jyly Rolan Garros týrniriniń finalynda qazaqstandyqtar Aleksandr Býblik pen Andrei Golýbevti utyp, chempion atanǵan bolatyn.
