Foto: primeminister.kz
Keshe Astanaǵa Aýǵanstannyń ónerkásip jáne saýda ministri Nýriddin Azizi bastaǵan 210 adamnan turatyn biznes-delegatsiia keldi, dep habarlaidy primeminister.kz saity.
Delegatsiiany áýejaida QR Premer-Ministrdiń orynbasary – saýda jáne integratsiia ministri Serik Jumanǵarin kútip aldy.
Qonaqtar qatarynda Aýǵanstannyń Ortalyq bankiniń basshylary, iri jeke menshik bankterdiń, «Da Afganistan Breshna Sherkat» (DABS) energetikalyq kompaniiasynyń, «Afgan telekom» (AfTel) telekomýnikatsiialyq kompaniiasynyń, aýyl sharýashylyǵy ónimderi men mal sharýashylyǵy palatasynyń, saýda-investitsiialyq palatasynyń, sondai-aq aýyl sharýashylyǵy, farmatsevtika, ónerkásip, kólik-logistika, injenerlik, toqyma jáne basqa kompaniialardyń ókilderi bar.
2 tamyzda Qazaqstan jáne Aýǵanstan kompaniialarynyń prezentatsiialary, B2B kelissózderi ótedi. 3 tamyzda biznes-forým jumysyn bastaidy, al 4 tamyzda elorda turǵyndary men qonaqtaryna aýǵan taýarlarynyń kórmesi (EXPO, Kongress-ortalyq) ashylady. Kórmede Aýǵanstannan túrli azyq-túlik, mys ydystar, mármár, kilemder, zergerlik buiymdar jáne basqa da kóptegen taýarlar usynylady.
Aita keteiik, Qazaqstan men Aýǵanstan arasyndaǵy taýar ainalymy 2022 jyly $987,9 mln boldy, bul ótken jyldyń sáikes kezeńimen salystyrǵanda 2,1 ese joǵary ($474,3 mln). Osy oraida kórsetkishtiń shamamen 90%-y qazaqstandyq eksportqa, negizinen óńdelgen ónimge tiesili. 2023 jyldyń 5 aiynda eki el arasyndaǵy saýda-sattyq $316,6 mln boldy, onyń $310 mln-y qazaqstandyq eksportqa tiesili.
Qazaqstannyń Aýǵanstanǵa azyq-túlik, munai-himiia, himiia, metallýrgiia, jeńil, mashina jasaý salalarynda jalpy $500 mln-nan astam somaǵa eksport jasaý áleýeti bar.
